【全劇終】《我喺街執咗個失憶嘅女仔返屋企》: 休比篇：會長會長會長會長會長

「阿帆！！！你諗住參加乜嘢呀？」說時遲那時快，小悠已經執好書包，衝過嚟問我。
 
雖然「神秘項目」呢個名聽落充滿伏味，但經過內心一番掙扎後，我選擇相信唐夕嵐。
 
畢竟佢講過，新項目唔可以同既有項目重覆，即係唔會係跑步，都唔會係跳高跳遠擲鐵餅嗰類。
 
而可以喺運動場上面鬥嘅，除咗上述嗰堆，其實唔多。
 
結合埋唐夕嵐之前應承過我，新項目會係唔使點樣需要體力呢個前提，我分析出所謂嘅神秘項目就係：
 




拋豆袋！
 
所以，我胸有成竹咁同小悠講：「話晒最後一年運動會，我會向高難度挑戰，參加神秘項目。」
 
小悠有啲驚訝：「阿帆你竟然咁有鬥志，加油呀！」
 
話晒拋豆袋呢啲高難度嘢都有得俾我參加，我唔拎返少少鬥志出嚟又點對得住唐夕嵐…？我一邊偷笑，一邊心諗。
 
「咁你呢？一定報好多項啦？」以小悠嘅身體能力，以及佢本身對呢類學校活動嘅熱情嚟講，即使係報晒全部項目我都唔會覺得出奇。
 




「我問過會長啦，佢話比起分散投資，集中練一樣先係最有效益！所以我決定淨係報一樣，就係跳高！」
 
跳高…？不過令人在意嘅唔係呢樣，而係：「又關羅凱撒咩事？」
 
「會長一早同我講過嚟緊係運動會，仲話睇好我可以拎牌！」
 
「…佢又會突然間咁關心你呀？」
 
「因為佢睇中咗我身體嘅靈活度！佢話喺呢間學校讀咗五年都未見過跳躍能力咁高嘅學生！」
 




我嘆氣，呢啲擺明呃細路嘅說話，羅凱撒居然講得出，更重要嘅係對小悠起到作用…
 
「係睇中你身體靈活度，定睇中你身體呀…」我用一個小悠聽唔到嘅聲量講。
 
有珀奈呢個校花送上門都唔要，反而纏住小悠…只可以講羅凱撒個腦都唔知諗咩。
 
「總之！嚟緊放學我都會跟住會長進行特訓！阿帆你唔使等我喇。」
 
…？！「羅凱撒幾時又識跳高呀？？」
 
「會長話佢初中嗰陣有練習跳高！所以可以教我少少技巧！」
 
有冇咁巧合…話佢冇企圖都冇人信…
 
我不忘提醒小悠：「你自己小心啲，唔好係咪都信羅凱撒…嗰個乜鬼嘢特訓，最好就係唔好去。」




 
小悠聽到，居然藐我：「阿帆你唔好咁幼稚啦，你真係人如其名，都係咁Q煩。」
 
居然俾個天生蠢才掉返轉頭話我幼稚，我馬上反擊：「邊個教你講啲咁粗俗嘅嘢！！？」
 
「邊度粗俗呀？你自己咪又係成日講粗口。」
 
我一時語塞，最後選擇戴返個頭盔：「…如果你真係咁想去嘅話咪照去囉，我又冇強制唔俾你去。」
 
不過一陣俾羅凱撒捉入儲物室禁室培慾嗰陣唔好喊——呢句我當然冇講出口。
 
「得啦，你夠鐘去接阿妹放學喇。」小悠提醒我。
 
「…係喎！」尋晚應承咗阿妹要護送佢返學放學，差啲冇咗件事。
 




「咁我去搵會長喇！」小悠對我揮手。
 
…雖然唔係好放心小悠呢邊，不過都係去接咗阿妹先。