【全劇終】《我喺街執咗個失憶嘅女仔返屋企》: 休比篇：突如其來的事件

「發生咩事！？」可以令阿妹驚惶失措，一定好大件事…。
 
阿妹睇起嚟依然心有餘悸，深呼吸幾啖，然後緩緩吐出：「頭先，我喺樓下遇到跟蹤狂…。」
 
「跟蹤狂？？！！！」我同小悠不約而同大叫。
 
「…其實，都係我懷疑啫，不過嗰個人由學校跟到我返屋企。」阿妹嘅眼神游移。
 
我馬上衝到阿妹旁邊，檢查佢有冇表面傷勢：「咁佢有冇傷害你？你有冇蝕底俾佢？」
 




小悠又埋嚟加把嘴：「個跟蹤狂有冇問你要錢買零食？！定係叫你俾晒身上啲零食佢？！」
 
「…你估個跟蹤狂係你咩。」我低聲吐槽。
 
「咁又冇，佢只係一直跟喺我後面，大概五十米嘅距離…」
 
跟蹤狂呢樣嘢，聽人講就聽得多，估唔到竟然有身邊人遇見嘅一日。
 
如果唔採取咩行動嘅話，呢類跟蹤狂通常會變本加厲，到時阿妹就渣都冇得剩。
 




所以，我地必須抽絲剝繭，逐步制定策略——首先，要掌握犯人嘅特徵：「個跟蹤狂係點嘅樣？著住咩衫？」
 
阿妹將手指放喺下巴，開始回想：「嗰個人大概1米8，高高瘦瘦，著住一件有兜帽嘅黑色大褸，所以睇唔到佢個樣。」
 
「了解，我地再觀察多一日，確認佢係咪真係跟蹤狂…保險起見，聽日我陪你一齊返學放學。」我對阿妹講。
 
「咁、咁又唔使！」
 
「阿妹你聽話啦！跟蹤狂呢樣嘢好危險架。」小悠喺旁邊勸喻。
 




「小悠講得啱，萬一你有咩事嘅話，我會內疚一世。」
 
「…咁好啦。」阿妹最後接納我嘅建議。
 
夜晚，我地將屋內所有窗簾拉上，因為聽講而家啲跟蹤狂會喺附近租一個單位用望遠鏡偷窺。唔止咁，我地仲喺大門外裝咗閉路電視，如果有可疑人物嘅話就會即刻望到。
 
…雖然個臨時網購返嚟嘅cctv真係好乸貴，但為咗保護阿妹嘅私隱（貞操），呢啲對策都係唔少得嘅。
 
「你地…會唔會誇張咗？」剛沖完涼嘅阿妹從浴室走出來問。
 
「呢啲嘢，都係以防萬一好啲。」我答。
 
「阿帆講得冇錯！你睇吓，就連休比都好似察覺到有事要發生咁，猛咁喺度叫…」小悠抱住不停亂叫嘅休比講。
 
「係喎，由頭先開始休比好似一直係咁叫。」而且，叫聲聽落異常亢奮。




 
「等我餵佢食兩粒牧草波波，佢就會冷靜架喇！」講完之後，小悠拎出一袋牧草波波。
 
望住休比，我突然諗起嗰個叫赤城紫悅嘅女仔——
 
「如果你同休比相處有困難，歡迎隨時嚟搵我。」
 
…我同休比相處得不知幾好。
 
「喂，俾我試吓餵。」我從小悠手中接過零食，「休比！過嚟食嘢…痛！！」
 
呢隻死仔，居然當咗我隻手指係牧草波波…。
 
「不如俾我試吓吖？」阿妹難得好有興致地問，「休比！有嘢食！」
 




休比一聽阿妹嘅呼喚，就從小悠嘅掌心跳到阿妹手上。
 
「睇嚟休比鍾意阿妹多過阿帆！」小悠不忘幫我補刀。
 
「豈有此理…我要再試！」
 
然後，我地三個都沉醉喺同休比呢隻夜行性動物嘅玩樂當中，慢慢將跟蹤狂呢件事，以及瞓覺本身呢回事置之腦後。