【全劇終】《我喺街執咗個失憶嘅女仔返屋企》: 休比篇：唯一的救贖

不過，我居然有興趣聽吓佢點鳩噏，於是問：「例如呢？即係我應該講啲咩先召喚到休比？」
 
「例如…神獸顯現，之類。」佢聳一聳肩。
 
我忍笑：「多謝你嘅建議，我會試吓架喇。」
 
準備再度轉身之際，呢個名為赤城紫悅嘅女性突然哄前，我地之間嘅距離縮到唔夠30cm。
 
佢觀察我嘅五官好一陣子，隨即開口：「點睇都係普通人，毫冇可取之處。」
 




「咩意思呀？」無啦啦俾人評頭品足，所以我語帶不滿。
 
「冇咩意思，我係唔明點解你會做到休比嘅主人。」
 
「嘖，你咁講嘅話，全世界嘅普通人都唔養得寵物？」
 
佢淡然一笑：「你鍾意點理解就點理解，再見。」
 
「應該唔會再見。」
 




「喂。」佢叫住我，「如果你同休比相處有困難，歡迎隨時搵我。」
 
我向佢點頭，隨即步出房間。
 
呼…呢段莫名其妙嘅遭遇終於畫上句號。
 
「至衰都係你隻死仔，無啦啦跟人走咗去，知唔知小悠幾掛住你？」等緊lift 嗰陣，我同籠入面嘅休比講。
 
…又唔睬我。
 




「…言靈真係有效？」
 
我望吓四圍，確認附近冇人之後，深深吸一口氣：「神——」
 
屌，我喺度做乜！
 
我居然真係聽嗰個叫赤城紫悅嘅人鳩噏！
 
我將淨低嗰幾隻字及時吞返落肚，繼續若無其事地等lift。
 
返到屋企之後，我第一時間將休比交返俾小悠。
 
「睇吓邊個返咗嚟？」
 
「係休比！！」佢同我想像一樣咁開心。




 
打開個籠之後，休比一支箭衝到小悠膊頭。
 
「我就知阿帆一定會帶休比返嚟！不過嗰個人又會肯俾返休比我地嘅？」
 
「總之休比返嚟就得啦，至於嗰個人…我諗都係怪人一個。」
 
「…怪人？」
 
我回想赤城紫悅嗰種帶人遊花園嘅講嘢方式：「咪成個羅凱撒咁。」
 
「會長？」
 
「你唔好問啦，我都唔知點解我遇到嘅都係怪人。」
 




不過，要講罪魁禍手嘅話，一定係眼前嘅小悠。
 
唔係我姓瀨，自從遇到佢之後，我身邊開始圍繞住一堆以前根本冇交集，亦都冇諗過會有交集嘅怪人。
 
學生會就係最好例子。
 
結果，因為休比，又識多個叫赤城紫悅嘅浴衣怪女。（雖然應該唔會再見面）
 
睇嚟我要多啲親近返阿妹，我唯一嘅救世主。
 
每當我俾一班怪人/煩膠纏擾到身心疲累嘅時候，阿妹都會用最有邏輯嘅思考，同埋最有營養嘅對話嚟洗滌我嘅心靈。
 
我想像唔到如果有一日連阿妹都變成小悠呢種煩膠（例如有起事上嚟，淨係識得叫「死喇！今次大件事喇！」，完全唔試吓自己思考解決方法先之類）嘅話，世界會陷入點樣嘅絕望…
 
呢個時候，門口傳嚟急促嘅鎖匙轉動聲，阿妹隨即破門而入：




 
「阿哥！死喇！今次大件事喇！」