【全劇終】《我喺街執咗個失憶嘅女仔返屋企》: 學生會補選篇：秘密作業

學生會選舉日即將來臨。
 
所有候選人似乎早就投入喺拉票活動中：學校嘅壁報版貼滿杜朋也個肥仔樣，午間廣播俾唐夕嵐用嚟叫人投票俾佢…
 
就連小悠都同我講，佢一有時間就去同小食部姨姨sell佢個炸豬扒政綱。
 
我同佢講：「你sell俾小食部阿姨有鬼用，佢地又冇份投票…」
 
佢聽完，一副華生你突破盲腸了嘅表情。
 




至於我，本身份政綱都寫得七七八八，不過最近又加多咗少少想法落去。
 
但叫我好似小悠佢地咁積極拉票嘅話，我又冇咩動力（恥力）…
 
所以，平常心態。
 
而且，比起浪費時間去拉票，我覺得自己有第二樣更有意義嘅嘢要做。
 
呢樣嘢唔可以喺屋企做，喺學校亦都要小心做，所以我趁呢兩日放學，book咗學校嘅美術室閉關。
 




美術老師日日一響放學鐘就走人，佢走咗之後成間美術室得返我一個，名正言順喺入面做咩都得，哈。
 
我用電話開住spotify，一邊播放節拍強勁嘅音樂，一邊專注喺眼前嘅作品上。
 
上完畫完送俾唐夕嵐嗰幅和泉紗霧之後，以前嘅手感好似逐少逐少返番嚟。
 
而更重要嘅係，我重新感受到畫畫帶俾我嘅莫大樂趣。
 
音樂聲倏然停止，取而代之嘅係電話響嘅通知。
 




我望吓係邊個喺咁唔合適嘅時候打嚟，然後按下接聽：「點呀？有咩唔可以msg講一定要打嚟？」
 
「阿帆？你喺邊呀？一放學就唔見咗人，我同張廷宇喺小食部等極你都唔嚟…」小悠嘅聲線隔住聽筒傳到耳裏。
 
「我咪同你講咗我有地方去吖嘛，你同張廷宇唔使等我，bye…」準備收線之際，佢又叫住我。
 
「喂喂喂，你去咗咩地方呀？今晚返唔返屋企？使唔使同阿妹講你唔返？」
 
我暗地嘆息：「我今晚返屋企，唔使同阿妹講我唔返，bye…」
 
「等等！你都未講你去咗邊！」
 
我二度嘆息，求其作咗個藉口：「…我去咗幫許正峰做啲嘢。」
 
「你幫佢做啲咩呀？學生會啲嘢？」




 
第三次嘆息：「唔關學生會事，係私事。」
 
「私事？係咩…」今次佢未講完，我就中斷佢：「小悠！我真係忙緊！總之我應承你食飯之前會返屋企好冇？」
 
最後佢接受咗我呢個承諾，我得以cut佢線。
 
畢竟佢咁樣連環追問法實在係有啲煩膠。
 
我重新按下播放，音樂聲再度響起。
 
係yoasobi嘅群青，真係啱晒而家嘅我聽。
 
手部動作跟隨音樂節拍逐筆喺畫紙上描繪，漸漸去到一個忘我境界。
 




我忍唔住閉上眼，用半桶水嘅日文跟住唱。
 
點知唱到「ありのままのかけがえのない僕だ」嗰句，無啦啦冇咗聲。
 
我擘大眼，見到嘅係今日第二個煩膠——
 
駱以雪唔知幾時企咗喺我隔離，我首群青好明顯係佢撳停嘅。
 
我反射性將枱上嘅畫紙翻轉。
 
「雖然我冇權過問你究竟喺度做緊咩，不過我想提醒你唱到走晒音，仲有你啲日文發音真係好難聽。」佢毫不留情地講。
 
我拎返部電話，撳播放鍵。
 
頭先未播完嘅群青傳入耳裏。




 
「…嘖，遲吓俾我做咗珀奈男朋友，你慌我啲日文仲會咁難聽咩。」我細聲抱怨。
 
「你講咩話？」
 
「冇！我話副會長你今日都係咁…聰明勤奮！」我配以營業式笑容講。
 
「梗係，放學之後巡視校園係學生會嘅職責。」
 
「乜放學巡視都要學生會做埋？」
 
佢一副理所當然嘅樣：「唔係你以為係邊個負責？」
 
「…俾你咁樣講一講，我即刻唔想選。」
 




「係就快，我都唔想俾一個要求全校女同學cosplay嘅變態佬做到學生會。」
 
我諗返幾日前嘅尷尬場面：「…嗰次！係誤會！」
 
「不過，我相信同學嘅眼光，佢地一定唔會投票俾你呢個有特別性癖嘅變態佬。」佢徹底無視我嘅解釋。
 
「到底你聽唔聽人講嘢…」
 
然後，佢望住我張畫紙：「你喺度畫緊咩？18+插畫？」
 
「…關你咩事？仲唔快啲走？一陣我啲變態性癖發作起上嚟，對你做啲咩就唔好啦。」好彩頭先即刻反轉咗張畫紙，我諗佢應該睇唔到我做緊咩（掛）。
 
佢嬲到臉都紅：「我連同你身處喺同一個地方呼吸一樣嘅空氣都唔想！」
 
「咁你出去吸新鮮空氣啦，bye。」我舉起左手。
 
駱以雪嬲爆爆走咗之後，我偷偷地鎖上美術室嘅門。
 
話說，希望頭先佢真係睇唔到我畫緊啲咩…
 
如果唔係，我應該會將呢份羞恥感帶到去畢業嗰日。