【全劇終】《我喺街執咗個失憶嘅女仔返屋企》: 學生會補選篇：虛假的初中生靜待破殼之時（四）

結果，校長親自打咗俾唐夕嵐家長（以及我家長），最後以體諒唐夕嵐因臨近比賽，加上又要選學生會而導致壓力過大為由，決定唔追究頭先嘅事。（話雖如此，我依然覺得呢啲係傑出學生嘅特權…）
 
順帶一提，貌似因為阿媽堅持收皮唔係粗口，所以我冇犯校規。學校頂唔順連環轟炸，最後撤消埋頭先嗰個小過。
 
事情總算圓滿解決。（大概）
 
踏出校長室嗰陣，我鬆一口氣。
 
話晒喺呢間學校讀咗5年，都未試過要打電話俾家長！
 




隔離嘅唐夕嵐居然仲笑笑口。
 
唔係我睇慣嘅營業式笑容，而係一個發出內心嘅微笑。
 
佢對訓導主任同校長嘅怨氣究竟有幾大…
 
不過，算係排解咗啲壓力（？），都好嘅。
 
行行吓佢無啦啦停低，對我攤大手板。
 




「…咩事？」
 
「你唔係畫咗幅紗霧送俾我？」
 
之前我見佢喺ig話只要有人畫和泉紗霧俾佢就咩都應承，所以畫咗一幅。
 
不過送都未送就俾佢話我性騷擾。
 
「唔啦，費事又俾人話我性騷擾。」
 




講完之後佢嘴都扁晒，睇個樣有百分之九十又想喊過。
 
我迅速投降：「得！俾你！」
 
喺書包摷返幅畫咗兩日嘅和泉紗霧，後面其實仲夾咗之前想搵佢幫手翻譯嗰封信。
 
不過，諗起佢頭先話憎死所有語言…都係算。
 
費事一陣搞到佢大壓力，出唔到比賽又瀨我。
 
我偷偷地將封信收埋，點知俾唐夕嵐睇到：「嗰封係…之前喺操場打掃嗰次，你俾過我睇嘅信？」
 
「係，不過我決定唔勞煩你，自己解決。」講完我將嗰幅和泉紗霧手繪放到佢手上。
 
佢望住幅畫：「好靚呀。」




 
「靚就好好珍惜，冇咩人有機會得到我親筆手繪架知唔知呀？」
 
「…我讚緊紗霧好靚，唔係讚緊你畫得靚。」
 
「你…！」
 
之後，佢突然喺我書包搶走嗰封俾我放好咗嘅信。
 
「喂！拎返嚟啦。」
 
佢舉高封信，望咗幾眼然後講：「俾幾日時間我。」
 
「…你唔係最憎語言架咩？仲幫我？」
 




「我係憎！不過鬼叫我咁叻～」睇嚟，天才嘅骨子裏都係帶住一股傲慢。
 
「咁，多謝你先喎。」
 
「你要多謝就多謝紗霧啦。」佢對我揚起嗰幅手繪。
 
「哈，唔知邊個頭先話係毒男睇嘅動漫呢？」
 
「唔同你講，夠鐘去練習。」佢對我扮咗個鬼臉。
 
嘖，幼稚鬼。
 
不過，比起掛起嗰副乖巧嘅笑容——
 
「喂！」我叫住佢，「頭先唔記得同你講。」




 
「嗯？」
 
我笑：「你嬲爆爆嗰陣幾似和泉紗霧，以後試吓多啲對我發嬲。」
 
「…ドM？」
 
「唔係呢個意思！話說你咩事個樣要咁嫌棄…」