【全劇終】《我喺街執咗個失憶嘅女仔返屋企》: 學生會補選篇：虛假的初中生靜待破殼之時（一）

「你…」講完半個字，唐夕嵐突然停低，四處張望。
 
「唔使望喇，呢度係學生會地頭，老師好少會上嚟，你有咩不滿就盡情發洩啦。」
 
「你頭先咩意思呀？？！」佢目露兇光問。
 
「咩咩意思呀？唔明你講咩。」
 
「…我問你頭先個政綱咩意思呀！」
 




我扮恍然大悟：「哦！頭先個政綱吓嘩？關你咩事？我鍾意和泉紗霧唔得嘅咩？」
 
「你根本特登嘅！」
 
「咩特登呀？你都話唔知和泉紗霧係乜水，咁我鍾意佢關你叉事咩？」
 
「…男仔都係幼稚鬼。」佢低頭，um咗一句。
 
我將手放喺耳邊：「咩話？大聲啲？」
 




「…你個死毒男！睇埋啲咁毒嘅嘢都算，仲想將呢啲毒文化帶入學校！」
 
「呵！唔知邊個喺ig出咗80幾個post，全部都係和泉紗霧和泉紗霧和泉紗霧呢？」
 
佢聽完窒咗窒，但好快擺返個勢：「…我未講完！你地啲高form都唔知有冇腦，咁嘅政綱都寫得出。」
 
「呵呵，我有咩寫唔出？只要本住對紗霧嘅愛，再毒啲我都寫得出呀。」
 
「你講完和泉紗霧未呀？死毒男！有女朋友仲睇啲咁毒嘅動漫…」
 




「未喎…等陣！咩女朋友呀？」我嚇一跳。
 
佢冷笑一聲：「咩人就會同咩人拍拖，我講緊話要將鐘聲變做乜野團子大家族嗰個女仔…你同佢諗出嚟啲政綱都係咁無聊。」之後佢開始連環發出恥笑聲。
 
「第一！我同佢冇拍拖！第二！得我一個可以笑佢！你啲低form唔該收收皮先…」
 
佢瞬間轉換表情，抬頭怒睥我。
 
「…你先至要收皮！收皮收皮收皮！全部高form都要收皮！！」
 
正想反擊之際，樓梯嗰邊傳出訓導主任嘅訓斥：「邊個咁大聲講粗口？！」
 
我同唐夕嵐嚇到企喺原地。
 
之後，訓導主任由樓下上到嚟：「頭先邊個咁大聲講粗口呀…夕嵐？」




 
唐夕嵐同訓導主任對上視線，瞬間臉容扭曲。
 
係過度驚慌所造成嘅嗰種。
 
「…你呢個時候唔係應該準備下個月學界精英賽？點解仲喺度？」訓導主任問。
 
我留意到唐夕嵐嘅身體好似輕微顫抖。
 
「頭先我聽到嗰把聲唔會係你吖嘛？」
 
唐夕嵐輕力搖頭，然後又點頭。
 
「你唔解釋清楚，我好難放你走架，係咪你講粗口呀？」
 




「唔…」唐夕嵐支支吾吾，表情似就快喊出嚟。
 
「講啦？」訓導主任再三催迫。
 
我暗地嘆口氣：「係我呀搣時，頭先啲收皮係我講，唔關佢事。」