【全劇終】《我喺街執咗個失憶嘅女仔返屋企》: 學生會補選篇：預演（下）

陸sir聽到之後睥行我：「點解釋呀？」
 
「喂，你係咪玩嘢呀？」我將個波射返俾唐夕嵐。
 
「我而家問你呀！！你問佢做咩呀？！」
 
「…和泉紗霧係我鍾意嗰個動漫角，好未？」我死死氣講。
 
擾攘咗一輪，陸sir話我用字冇明顯性騷擾企圖，所以冇通知校長，只係叫我掉位坐算。
 




之後，到我出去演講。
 
羅凱撒遞個咪俾我，示意我開始。
 
我清吓喉嚨，原本諗住棒讀自己份政綱就算。
 
不過頭先俾唐夕嵐咁樣跣一跣，唔報吓仇硬係有啲唔gur。
 
所以，我將原來份講稿飛落地下：「我地要革新！」
 




在場每一對眼都望住我。
 
「舊時代嘅政綱已經係過去嘅遺物！21世紀嘅學生唔再需要嗰堆用唔著嘅購物優惠！更加唔需要乜野文具雨具借用服務！」
 
我感受到來自唐夕嵐嘅怒視目光。
 
望住佢呢個樣，我更加意氣高昂：「我地需要嘅係一個打破舊有風格嘅校園，所以我當選學生會之後，會建議學校將插畫同輕小說創作列做必修科！仲有！將全校鐘聲改做和泉紗霧角色歌！仲有！將全校嘅PE褸換做和泉紗霧同款！最重要係！全校女同學返學都要cosplay和泉紗霧！」
 
講完之後，全場靜咗幾秒。
 




除咗小悠依然一臉雀躍（佢由聽到我話將鐘聲換做和泉紗霧角色歌開始已經雙眼發光），現任學生會成員、陸sir、杜朋也同唐夕嵐不約而同地用一副「你做乜鳩阿」嘅表情望住我。
 
「…多謝。」一陣尷尬油然而生，我趕快向大家鞠躬，然後返埋位。
 
「咳、高同學嘅演講內容我就不予置評，不過技巧上有以下幾點注意…」陸sir開始評論我頭先表現。
 
但呢一刻嘅我，已經冇心機聽。
 
我頭先做咗啲咩蠢事！！！！！！！！！！
 
我居然當住學生會同老師面前sell個九唔搭八政綱！！！！！
 
我吐出一口代表社會性死亡嘅嘆息，將頭重重落喺眼前嘅長枱上。
 
直到唔知幾時，羅凱撒宣佈解散：「多謝四位同學參與今次『學長學妹計劃』嘅試行版，為咗了解同學對呢個計劃嘅意見，稍後我地會派問卷俾大家做。」




 
呼——終於完，終於唔使再見到唐夕嵐，呢個搞到我暴走嘅虛假初中生。
 
我快手執好書包，狗衝出學生會室。
 
「阿帆！」小悠追咗上嚟。
 
「…快啲行，我想返屋企摺埋。」以沖淡頭先嗰段已經烙印喺我中學生涯嘅黑歷史。
 
我拉起小悠隻手，想迅速逃離呢個尷尬現場。
 
點知佢話：「唔係呀！我嚟係想同你講，今日你自己返去先，我約咗朋也去車站前面買布甸食。」
 
「…布甸？」
 




「嗯！今日買一送一！」
 
呢個時候杜朋也出嚟，用隻又肥又粗嘅手抆住小悠衫尾：「我地行未呀？」
 
「行啦行啦！再唔行就賣晒架喇！拜拜阿帆！」小悠好快同我揮手。
 
之後，兩條友哼住團子大家族，跳吓彈吓咁走咗。
 
…有異性（仲要係肥仔）冇人性。
 
準備踏上孤獨嘅旅途時，一陣雜亂腳步聲從後追上。
 
我轉身一睇，係憤怒值處於臨界點嘅唐夕嵐。