【全劇終】《我喺街執咗個失憶嘅女仔返屋企》: 學生會補選篇：休比的表演時間

夜晚。
 
趁得自己喺房嗰陣，我又開返之前阿爸sd過嚟嗰封信睇。
 
話唔定，睇多兩睇會有新諗法。
 
羅凱撒。
 
信上面我唯一睇得明嘅三隻字。
 




我拎張紙同筆，開始模仿上面嘅字跡。
 
如果封野真係我寫嘅話，可能抄寫一次會有啲印象？
 
點知寫左兩句都冇，小悠帶埋休比衝入嚟。
 
「阿帆！！」
 
我嚇到求其搵野冚住正在抄寫嘅信。
 




冇咩必要嘅話，我唔想俾小悠知呢件事。
 
關於我同羅凱撒嘅野。
 
因為…我都唔知，只係唔想小悠同羅凱撒扯上咁多關係。
 
「你做緊咩呀？」
 
「咩都冇！你搵我咩事呀？」
 




佢一臉興奮：「頭先休比識打關斗呀！我咪第一時間想叫你睇吓囉！」
 
「吓？？真係？？」我都雀躍起嚟。
 
「嗯嗯！休比休比，再嚟一次！」
 
休比好似真係聽得明小悠講嘅野咁，喺佢手掌打咗幾個筋斗。
 
「俾我試吓！！」我接過休比，然後同佢講，「休比休比！再打多個嚟睇吓？」
 
冇反應。
 
「…唔得嘅？」我抬頭問小悠。
 
「可、可能休比太攰喇！你聽日再試吓？」




 
「不如你再試多次叫佢？」
 
小悠點點頭：「休比，你可唔可以喺阿帆手掌表演打關斗呀？」
 
休比聽到之後，開始喺我手心郁起嚟。
 
「果然，休比淨係聽你講。」我望住打關斗嘅休比講。
 
「梗係唔係啦，你唔記得只要叫休比個名，佢就會跳上…」小悠講到一半打咗個乞嗤，因為面對面嘅關係，我食到應一應。
 
「喂屌！」
 
「對唔住呀…」然後佢又打多個。
 




「你鼻敏感呀？」我問。
 
小悠拎咗兩張紙巾搖頭：「朋也話今日佢有少少病，我可能俾佢傳染咗。」
 
「嗰個死肥仔真係…」
 
「你唔好再叫佢死肥仔啦！都話人地叫朋也！」
 
「睇嚟你好鍾意呢個學弟喎。」
 
「你唔覺得佢好可愛架咩？而且我地一樣咁鐘意食野…」
 
我笑：「知喇，你兩個雙劍合壁，小食部一定俾你地食到破產清盤。」
 
「如果佢有得賣炸豬扒丼嘅話，絕對有可能！」




 
我為我地嘅對話發出無奈笑聲，笑聲過後係一陣嘆氣。
 
「阿帆？」小悠察覺到。
 
「冇，我諗起聽日又要同唐夕嵐見面就覺得煩，如果唐夕嵐好似肥仔咁親切，你話幾好呢。」
 
「…我相信你同夕嵐終有一日一定會傾得埋嘅！」
 
我嘆息：「咁我先接收你嘅祝福…俾返休比你，我去瞓覺。」
 
結果第二日，我冇好似預期咁同唐夕嵐進行第二次見面，而且，仲俾我知道咗一個驚人消息。