【全劇終】《我喺街執咗個失憶嘅女仔返屋企》: 學生會補選篇：破冰遊戲（下）

5分鐘眨吓眼過，好快到咗我地互相介紹嘅時間。
 
首先由小悠同個肥仔開始。
 
小悠企起身，羅凱撒遞咗支咪俾佢。
 
「喂喂？喺我隔離嘅係2A班杜朋也同學，最鍾意食嘅野係漢堡包，一日可以食十個。另外好鍾意自己個名，父母因為一套叫clannad嘅動畫相識繼而相戀，所以改佢個名做入面嘅男主角朋也，有個叫小渚嘅妹妹，今年兩歲。」
 
羅凱撒同許正峰一邊聽，一邊mark野，可能評緊分。
 




然後到嗰個叫杜朋也嘅肥仔：「佢係小悠，讀5E班，最鍾意嘅野食係20蚊3條嘅繽紛樂。同我一樣咁鐘意自己個名，因為係好重要嘅人送俾佢嘅禮物，近來嘅願望係學校小食部有得賣炸豬扒丼…嗯嗯呢一點我都好認同…」
 
連自我介紹都掛住食，真係服咗佢…不過有機會我都想試吓小食部嘅炸豬扒丼。
 
「好，到唐夕嵐學妹。」許正峰開咪講，依然係咁強調學妹呢兩個字。
 
唐夕嵐點頭回應，然後以優雅嘅姿勢企起身，以優雅嘅字句介紹我，最後以優雅嘅笑容講多謝。
 
羅凱撒嘴角一揚，似係對佢表現好滿意。
 




唔講嘅話，仲以為唐夕嵐有份選學生會。
 
「到你喇。」許正峰將咪交俾我。
 
我照稿讀：「佢係2A班唐夕嵐，興趣係鑽研新知識，認為學習係每個學生嘅本份，喺呢六年入面希望運用佢自己小小嘅力量為學校帶嚟一分良好嘅改變，多謝。額、句多謝係佢講嘅。」
 
坐返低之後，唐夕嵐臉上依舊係由頭到尾嗰副營業式笑容。
 
羅凱撒講咗堆廢話做總結之後，今日嘅見面就完咗。
 




一宣佈解散，唐夕嵐就急急腳走咗去，望吓小悠嗰邊，依然同肥仔有傾有講。
 
「阿帆！」一條友返去嗰陣，俾小悠從後追上。
 
「咦？肥仔走咗嗱？」我問。
 
「人地唔係叫肥仔，叫朋也呀！」
 
「是但啦…又唔係熟，」我猶豫緊，好唔好向小悠請教。
 
關於點樣同初中生相處——先唔講打成一片，至少唔好咁尷尬先。
 
諗咗兩秒，我開口：「問你啲野，你點同肥仔打開話題？」
 
「話題？」小悠作思考狀，「冇喎，好自然就講到啲大家都鍾意嘅野，嘻嘻。」




 
大家都鍾意嘅野…？
 
我連唐夕嵐鍾意咩都唔知，我又唔鍾意鑽研新知識嘅…
 
小悠一邊行，一邊哼起不知名歌曲。
 
「你唱緊乜？」
 
「頭先朋也教我唱嘅團子大家族！佢話佢超鍾意呢首歌！」講完佢又繼續哼。
 
或者，下次見面我應該問吓唐夕嵐鍾意聽咩歌？
 
不過提起鍾意，我突然間諗起一件事。
 




頭先肥仔介紹小悠嗰陣，講咗句令我有啲在意嘅野。
 
「小悠，頭先杜朋也話你個名係一個對你好重要嘅人送俾你？」我言下之意係想問佢係咪又記返起啲咩。
 
小悠嘅歌聲驀然停止。
 
兩秒之後，佢答：「唔知呀，不過我有呢種感覺。」