【全劇終】《我喺街執咗個失憶嘅女仔返屋企》: 學生會補選篇：排球戰（下）

之後，到小悠發球。
 
點知佢太大力，打出咗界。
 
14：13。
 
「Yes！！！多謝喎！！！」我原地歡呼。
 
到我發球過去，腦入面開始思考必勝策略。
 




始終場上得返我一個（駱以雪咁嘅狀態，唔方便太大動作…），而對面係目測180嘅許正峰同埋彈跳力驚人嘅小悠，我怕我一個砌唔掂佢兩個。
 
不過，就算用任何方法，都唔可以俾佢地贏。
 
邊個叫佢地頭先咁得戚？
 
當正自己贏梗咁款。
 
明明唔係熟，又要同人high five。
 




…話說，點解high five要十指緊扣？
 
求其拍一吓咪算囉。
 
……。
 
右腹突然傳來痛楚。
 
「痛！」我發出慘叫，先發現小悠唔知幾時向我殺球。
 




然後，係對面嘅歡呼聲：「15：13！」
 
比賽結束。
 
我輸咗。
 
「多謝你杯珍奶！」許正峰隔住個網講，然後示意我靠近：「雖然冇得睇阿雪嘅放手飲珍奶挑戰，不過頭先場波我已經大飽眼福…」
 
「……」
 
許正峰喺我眼前揮手：「喂，冇反應嘅？輸波啫，唔使咁大打擊呀？」
 
我冇理佢，想去關心吓駱以雪至發現佢一早唔見咗人，應該已經去咗更衣室。
 
「等我諗定陣間飲咩先…」許正峰伸個懶腰。




 
「我要特大嘅珍珠奶綠！多甜！」小悠喺隔離附和。
 
「真係估唔到，同你第一次part就咁合拍，以我地兩個嘅實力進軍校隊都唔成問題～」
 
「我都係咁覺得呀！！！」
 
「不過，都有可能係對手太廢嘅關係，我地要謙卑、謙卑…」
 
「你講得啱！」
 
許正峰望咗我兩眼，然後收起笑容：「喂，咁樣串法都唔還擊？唔係咁小氣吓嘩？」
 
「阿帆你嬲呀？」
 




「……」
 
「最多請返你飲珍奶囉，順便可以請埋阿雪飲，咁我就可以睇阿雪表演放手飲珍奶…」
 
許正峰講都未講完，內心突然有種衝動驅使我破口大鬧：
 
「淨係掛住睇人用對波放珍奶！你有冇關心過人地需要？又話鍾意人？你女朋友頭先打打吓波甩咗個bra扣嗰陣你…」
 
「啪！」一吓清脆嘅響聲，然後係左邊臉嘅劇烈灼痛。
 
駱以雪唔知幾時喺更衣室出咗嚟，送咗一吓兜巴昇俾我。
 
許正峰同小悠都睇到呆晒。
 
俾駱以雪昇完之後，我頭腦一秒清醒。




 
……我頭先發咩神經？
 
「你使唔使咁大聲講出嚟？？」駱以雪紅住臉講。
 
「對、對唔住。」腦海依然一片混亂，只係知道我唔道歉嘅話下場會好慘。
 
…我究竟搞咩？明明唔係在意場比賽輸贏。
 
突然，場外一陣緩慢拍掌聲：「精彩，果然係場好精彩嘅球賽。」
 
我望向聲音來源。
 
「…羅凱撒？」