【全劇終】《我喺街執咗個失憶嘅女仔返屋企》: 學生會補選篇：排球戰（中）

經抽籤後，我同駱以雪一組，許正峰就同小悠一組。
 
開波之前，許正峰提議：「邊隊拎15分先就贏！輸波嗰隊要請贏咗嗰隊飲珍珠奶茶！」
 
唔使問，小悠喺佢隔離雙眼發光：「好提議呀！」
 
本來應該好容易KO嘅對手，就咁俾許正峰激起咗無謂嘅爭勝意志。
 
「咁你地拎定銀包，」駱以雪一副自信樣，究竟知唔知許正峰其實想睇波多過打波…「你，唔好累我輸。」
 




「得喇。」我嘆一口氣，睇嚟又係一場麻煩嘅比賽。
 
開波。
 
許正峰發球過嚟—>我喺後面接—>駱以雪輕易而舉將個波殺返過去，重覆咗幾次類似畫面，我同駱以雪領先緊幾分。
 
睇嚟單計球技，我同駱以雪更勝一籌。
 
至於小悠落場嘅作用…除咗食花生同埋請我飲珍奶之外我諗唔到，哈。
 




直到比數去到9：12，許正峰眼角突然露出鋒芒，嘴角一揚：「小悠！」
 
小悠彈前兩步：「係！」
 
呢兩句就好似咒語咁，令球場上局勢一口氣逆轉。
 
許正峰退咗落後防，小悠就上前變咗主力，呢個組合聽起嚟好似好虧，但事實係小悠憑佢驚人嘅彈跳力好幾次將個波殺返嚟，我同駱以雪都接唔到。
 
佢地就係咁將比數反超前，而家係13：12。
 




中計。
 
我一早應該諗到，儘管小悠平時做乜都唔掂，但佢少數做得到，甚至可以話做得好嘅事就係爬樹！！
 
即係話，佢身體靈活度唔差得去邊。
 
睇嚟許正峰嘅策略係叫小悠扮廢，消耗我地呢邊嘅體力，直到時機來臨再一口氣反超前。
 
我望吓駱以雪，佢已經開始喘氣。
 
但對面冇對我地留手，一個快攻殺過嚟。
 
駱以雪想飛身去接，但喺接到之前，我突然聽到「霹啪」一聲。
 
……？




 
正疑惑聲音來源嘅同時，駱以雪已經俾咗答案我。
 
透過純白又貼身嘅PE衫，我從後方清楚見到佢裏面件貼身衣物處於一個鬆開咗扣嘅狀態…
 
加上佢一臉尷尬，都幾乎肯定我冇睇錯。
 
對面場嘅許正峰見我地接唔到波，嗌都嗌唔切：「Yeah！14：12！拎多一分就收工！」
 
歡呼同時，佢舉起兩隻手同小悠互相擊掌。
 
用十指緊扣嘅方式。
 
「……！！！」
 




我回過神，走到駱以雪耳邊講：「…你使唔使去更衣室整一整先？」
 
我係第一次見到佢塊面咁紅：「唔、唔使！至少要等我地追返上去…」
 
更衣室就喺我地正後方，如果駱以雪而家離場，就會俾對面發現佢嘅窘況。
 
……雖然呢個畫面應該係許正峰夢寐以求嘅。
 
「好嘢！阿帆請飲珍珠奶茶！」呢個時候，小悠向我呢邊嗌。
 
諗起頭先佢同許正峰十指緊扣，我嘅鬥志莫名被激起。
 
唔可以俾佢地贏得咁輕鬆。
 
我啪響手指，同旁邊嘅駱以雪講：




 
「你去後面，之後開始——由我做主力。」