【全劇終】《我喺街執咗個失憶嘅女仔返屋企》: 學生會補選篇：星座運程

結果問勻所有老師，肯認真望一眼封信嘅一個都冇，只係叫我有時間就俾心機溫公開試。
 
「唉。」我咬住包檸檬茶嘆氣，隔離嘅張廷宇由小息開始一直喺度撳電話。
 
「咩事唉聲嘆氣呢？」佢視線冇離開過電話。
 
「…點解人要講唔同嘅語言？」我問咗個相當高深嘅問題。
 
張廷宇終於望吓我：「呢個問題，上帝應該可以解答你。」
 




我又嘆口氣，連google translate 同老師都幫唔到我，我諗我嘅上帝淨返關鍵人物羅凱撒一個。
 
我決定暫時擱置呢件事，改問張廷宇：「你成朝喺個電話度研究啲咩？」
 
張廷宇口角含春：「最近芝芝醉心星座研究，我身為男朋友當然要了解吓啦，唔係點有共同話題？」
 
「咁你研究到啲咩出嚟？」
 
「未，不過我睇緊呢個『今個星期內一定會有意想不到嘅好事喺前方等緊你』嘅星座排名。」
 




「個名會唔會長咗啲…」
 
「妖呢啲濕碎野唔好理啦，我記得你係獅子座？」張廷宇摸下巴。
 
「獅子…？唔知喎，不嬲唔信呢啲八婆野。」
 
「獅子座排第二名，睇嚟今個禮拜有好事等緊你。」
 
我冷笑，俾學生會班痴線佬煩少陣已經要感恩，以為返到屋企可以抖嘅時候，小悠仲要定期製造麻煩——好事呢兩個字對我嚟講係虛無。
 




「咁第一名係咩星座？」
 
「第一名犀利喇！係處女座！」
 
呢個時候，小悠捧住兩袋燒賣過嚟：「你地講緊咩呀？咩處女座呀？」
 
「係喎，識你咁耐都唔知你咩星座添。」張廷宇一副八婆口吻問小悠。
 
小悠隊咗粒燒賣入口，邊食邊諗：「我呀？我都唔知自己咩星座喎。」
 
「咁你幾時生日呀？我運用我嘅星座知識幫你算一算。」
 
小悠又諗咗陣：「唔…8月31號！」
 
「8月31號…你等我一陣呀吓。」呢個張廷宇早兩秒先吹到自己神算咁，結果原來要撳電話。




 
不過，8月31號…？
 
原來小悠除左自己個名之外，仲記得自己生日。
 
如果係咁嘅話，可以好似之前阿妹咁，同佢慶祝吓。
 
「搵到喇！！吖唔係！我算到喇！！」
 
「係咩呀係咩呀？我係咩星座呀？」小悠好雀躍。
 
「你係處女座，即係今個禮拜內會有意想不到嘅好事發生排行榜嘅第一名！」
 
講完之後，佢地兩條友喺度歡呼。
 




「叮噹叮噹——」響鐘，張廷宇馬上跑走，話要去搵芝芝。
 
佢走咗之後，我望向仲食緊燒賣嘅小悠：「乜原來你生日係8月31號？」
 
「唔…可以咁講。」
 
「咩意思？」
 
「正確嚟講，呢一日比真正嘅生日更加重要。」
 
我笑：「乜野咁巴閉緊要過生日？」
 
小悠同我四目相對，臉上泛起笑容：「因為8月31號係阿帆同小悠相遇嘅日子。」
 
「……」我呆咗一秒先回神，然後推佢額頭：「邊個教你學人用自稱？想走可愛路線呀？」




 
佢笑笑口，咩都冇答。
 
至於我推佢額頭嘅原因，應該唔係因為想掩飾嗰吓唔知咩事快咗一拍嘅心跳。