【全劇終】《我喺街執咗個失憶嘅女仔返屋企》: 樓梯間的相遇

臨天光，我頂唔順恰著咗，到有返意識嗰陣耳邊係阿妹把聲。
 
「哥！快啲起身呀！就嚟遲到喇！」
 
…遲到？
 
頂！唔記得今日要返學！
 
之後我同阿妹拿拿聲跑返屋企，希望小悠已經醒咗。
 




撳到門鐘爆炸前一刻，大門緩緩打開，然後係小悠一副睡眼惺忪嘅樣，顯然唔知自己間接害到我同阿妹瞓街。
 
果然，佢第一句就係：「…帆？阿妹？你地咁早去咗邊呀？」
 
「你仲好講！」
 
枉我成晚瞓公園硬板，呢個衰妹居然喺屋企高床軟枕…
 
不過，而家唔係教訓佢嘅時候，我衝入屋刷牙洗臉換衫，費事又俾學生會周我遲到。
 




結果，我喺響緊鐘嘅時候成功達陣。
 
企喺門口嘅依然係駱以雪，唔使講，由我喺遠處跑過嚟佢已經一直睥住我。
 
「…點解成日都係你，乜學生會冇其他人喇咩？」我抖順氣講。
 
「你唔即刻同我上課室就等收遲到紙。」
 
「上緊囉！」我大聲回敬，為趕得切而鬆一口氣。
 




上樓梯嗰陣，我開始整理返因為匆忙而暫時俾我擱置一角嘅事。
 
尋晚諗到用Google translate之後，我成晚冇瞓過，望住阿爸sd過嚟張低清圖，想一字不漏打返上面啲字出嚟。
 
唔使諗都知，係唔work嘅。
 
先唔講張圖啲字蒙到睇都有困難，重點係，
 
有啲字母我根本唔識打！
 
例如有啲變形aeiou上面有幾點或者一撇…
 
人生第一次後悔自己冇好好讀書（雖然兩件事關係唔大）。
 
如果係日文嘅話，都話可以叫珀奈幫幫手，但而家呢個情況，我諗到嘅係試吓問老師，睇吓佢地有冇頭緒係咩話嚟。




 
諗得入神之際，膊頭俾人撞咗吓，然後有疊紙跌咗落地下。
 
「…Sorry。」我即刻道歉，然後幫眼前人執返散落一地嘅紙。
 
睇真啲，係一個低form（應該）嘅女仔。
 
我望一望手上嘅，原來係一張張畫紙，上面畫咗啲草稿。
 
「畫得幾靚，俾返你。」我遞返俾佢。
 
點知佢一手搶過，粒聲唔出就行咗去。
 
我望住佢走入2A班房。
 




「而家啲低form，撞到人唔道歉不突止仲要幫佢執野連唔該都冇句…」我細聲講，然後死死氣氣躝返5樓班房。
 

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

下個禮拜，新章！