【全劇終】《我喺街執咗個失憶嘅女仔返屋企》: 被開啟的過往（上）

幾日之後，我認清咗兩個事實。
 
第一，用愛發電係天下間最大嘅大話，正如單憑對阿妹嘅感情，係唔可以變成甜品大師。
 
第二係關於小悠，可能，或者，有0.0001％機會，佢真係喺整蛋糕上有天份。
 
用兩個字總結我整蛋糕嘅經驗：失敗。
 
雖然諗過叫小悠幫手整，但話晒阿妹生日，冇理由請槍架？咁咪違背我一開始嘅目的。
 




但現階段嚟講，要我親手做蛋糕似乎真係冇可能。
 
所以，關於阿妹嘅生日禮物，睇嚟要煩多一排。
 
「哥。」
 
「吓？」阿妹把聲打斷我嘅思考。
 
「我部電腦啲防毒好似過咗期，你一陣可唔可以幫我望吓？」
 




「哦，上次整電腦個哥哥仔話啲防毒要重新裝過，我陣間幫你搞掂佢啦。」
 
「唔該。」
 
夜晚。
 
小悠喺廳同休比玩，我就喺房睇緊咒術迴戰。
 
睇到戲肉嗰陣，出面突然有敲門聲。
 




「阿妹？」
 
「我嚟拎部電腦俾你。」
 
「吖係喎，差啲唔記得，得啦我幫你搞掂。」
 
「部機放喺你度一晚先啦，我而家去瞓喇。」
 
我望望個鐘：「而家十點幾咋喎？咁早瞓？」
 
「我聽朝七點要返學校當值，所以想早啲瞓。」
 
自從做咗學生會之後，阿妹好似忙咗好多，加上學業壓力，我真係驚遲早有一日佢會頂唔順。
 
雖然見到佢咁投入學校嘅活動我都好開心，因為咁樣代表佢真係慢慢行返出嚟——喺兩年前嘅陰影裏面。




 
「辛苦你喇，副會長。」我摸吓佢個頭。
 
「…你都早抖。」
 
跟住我繼續睇埋套咒術迴戰，唔經唔覺連小悠都瞓埋，我伸個懶腰，打開咗阿妹部電腦。
 
搞掂晒啲防毒之後，我就諗住幫佢刪咁啲無謂嘢，呢個時候，我突然望到一個叫做「日記」 嘅file。