【全劇終】《我喺街執咗個失憶嘅女仔返屋企》: 過去與現在

第二日放學，我同小悠去咗家政室。
 
入都去影都冇隻，得份食譜放咗喺枱面。
 
「又話芝芝教我地整？人呢？」我問。
 
呢個時候，小悠電話響，佢拎出嚟睇兩睇：「芝芝話佢臨時有事所以嚟唔到教我地喇，不過佢已經準備好材料同食譜，叫我地自己試吓整喎。」
 
我感動到差啲流眼淚，芝芝真係一個好老師。
 




「屌，咁我返去喇。」我孭書包準備走人。
 
「你唔整嗱？」
 
「都冇人教，點整呀？」
 
小悠拎起枱面份食譜：「你要對我嘅理解力＋自學能力有信心！」
 
…呢句野由佢把口講出嚟會唔會太冇說服力。
 




不過我有啲興趣究竟小悠會整pat乜嘢出嚟，所以決定唔走住：「好，我睇你表演。」
 
「放心！好快就有蛋糕食！」
 
「聽住先啦…」
 
之後，我喺側邊讀食譜，小悠就落手落腳做。
 
「跟住呢？」佢一路攪手上盤嘢，一路問。
 




「倒入牛奶，攪勻。」我毫無抑揚頓挫地讀出。
 
小悠將啲奶倒入個碗，然後又係攪攪攪。
 
不過，佢動作比我想像中俐落好多，暫時未發生令家政室毀滅嘅情況。
 
「加完奶之後呢？」
 
「你以前可能係識整蛋糕嘅人…」我忽然諗到。
 
每次見到小悠好熱衷又或者專注喺一樣嘢嘅時候，我總會控制唔到咁將嗰樣嘢同小悠嘅過去連結。
 
佢繼續喺度攪：「你唔覺得係『而家』嘅我有整蛋糕嘅天份咩？」
 
「邊有人咁樣讚自己架？」




 
「我講真架。」
 
「？」
 
小悠停咗一停，然後講：「我有種感覺，就係可能唔應該再執著過去呢樣嘢，至少比起我地掌握嘅當下，過去只係一樣微不足道嘅野嚟。」
 
我擰頭：「每個人嘅『現在』都係由你口中微不足道嘅過去所組成，冇過去就冇當下，而且…」
 
如果冇咗「幫小悠尋找過去」呢個理由，我就會真真正正變成佢口中微不足道嘅「過去」。
 
「而且？」
 
我別過視線：「冇野。」
 




「總之，我應承咗會幫你搵返你嘅記憶就一定會做，即使你認為自己嘅過去一啲都唔重要都好。」最後我講。
 
「或者你講得啱，比起一開始，我愈嚟愈覺得以前嘅野根本冇所謂…因為對而家嘅我嚟講，同阿帆過嘅每一日先係最重要。」
 
聽完佢咁講，我感覺到塊面好熱，於是即刻擰咩面，好彩小悠應該見唔到。
 
「仲有同阿妹、芝芝、同埋張廷宇過嘅每一日都好重要！」佢若無其事咁舉起手指開始數。
 
「…真係服咗你。」我鬆一口氣嘅同時，心入面又有種翳住翳住嘅感覺。
 
「下個步驟呢？」呢個時候佢催我。
 
我回過神，繼續讀食譜：「之後加麵粉呀，唔好咁大力攪。」
 
「OK！」




 
我一直注視住小悠嘅側面，佢認認真真整蛋糕個樣，同平時kai爆嘅佢有啲唔同。
 
意思唔係話外貌上有咩改變，

而係成個人散發嘅氛圍，好似變咗另一個人咁。
 
到察覺到嗰陣，我先發現自己原來望咗佢好耐。
 
我即刻望向第二度。
 
最後我地用咗成粒鐘，整咗個稱得上好成功嘅蛋糕出嚟。
 
所以我信心都大增，連小悠都整到，冇理由我整唔到掛？
 




尤其是我帶住對阿妹嘅感情！真係諗唔到失敗嘅理由。
 
於是我暗中決定，聽日放學之後開始練兵，務求整一個完美嘅生日蛋糕俾阿妹。