【全劇終】《我喺街執咗個失憶嘅女仔返屋企》: 整電腦（三）

未行入去，已經喺出面聞到令人懷念嘅茶葉味。
 
我諗起細個嗰陣阿爸阿媽因為工作關係會帶我周圍飛，而上機前一晚會泡茶俾我飲（不如話係佢地習慣）。
 
「茶葉舖？」
 
千惠唔出聲拉咗我入去。
 
入到去，佢走去搞人啲茶葉餅，搞咗十幾分鐘仲要俾錢買埋。
 




出返去之後我笑佢：「仲以為你去邊，原來嚟買茶葉，乜你咁老餅嘅咩？」
 
佢挽住頭先買袋嘢：「唔得咩？」
 
「得…不過想話你都幾揼本啫。」頭先我偷聽到老細講，千惠手上袋嘢成差嘢咁滯。
 
「你又知我揼本？你對茶好有研究架？」
 
「咁又唔好用啲咁專業嘅詞語，係以前同屋企人買得多啫。」
 




「咁啱嘅？我都係喎。」
 
「你又係？唔通我地啲屋企人一樣嘅？」我搞爛gag。
 
「每次跟阿爺學完空手道，佢就會沖茶俾我飲，有時仲會教我點揀。」
 
雖然冇估到佢會突然講，不過都話架啦，佢真係識空手道，唔怪得上次撻到駱以雪攤攤腰。
 
「你跟你阿爺學空手道？」
 




「嗯，佢係空手道教練。」
 
佢講完，我個腦即刻浮現漫畫入面嗰啲肌肉老頭。
 
千惠跟住講：「細個有一排阿爸同阿媽去外國做嘢，我就跟我阿爺住，空手道都係嗰陣跟佢學嘅。」
 
「直到而家？咁你係咩帶呀？」
 
佢笑咗：「你好似好有興趣？」
 
「成日聽黑帶係最勁，想知仲有咩顏色啫。」
 
「你搵日嚟我阿爺屋企吖，我教你。」佢好有興致咁講，雖然唔知係認真定鳩噏。
 
不過，今次係第一次聽佢講有關屋企嘅嘢，我居然有種…應該話同病相憐嘅感覺？




 
「其實，我阿爸阿媽都長期外國做嘢，好日都唔返嚟一次。」
 
「咁你幾耐冇見過佢地呀？」
 
「唔計face time嘅話，我諗都有2年？3年？」
 
「咁我又冇你咁慘，嗰陣阿爸阿媽都係去咗兩三個月就返嚟接我走。」
 
「你算好好彩啦，我屋企呢平時就得我同阿妹，差唔多所有嘢都係佢負責。」
 
「咁晴晴係個好叻嘅女仔嚟嘅…」
 
「係就係，但係有時…你唔好同佢講呀，我覺得佢似家姐或者阿媽多啲…成日叫我執房，房入面啲嘢就嚟俾佢掉晒架喇。」
 




「哦！你死喇，我即刻同佢講！」
 
「點呀小學雞？玩告狀呀？」