【全劇終】《我喺街執咗個失憶嘅女仔返屋企》: 整電腦（二）

佢岳高頭望咗招牌一眼，我乘機潤佢：「點呀？係咪從來冇嚟過呢啲地方呢？」
 
「喂，又嚟睇書呀？」同我講嘢嘅係呢間漫畫舖嘅後生老細。
 
「係呀，等緊部腦整完…最近有咩好睇呀？」
 
「有，大把啦…咦，帶埋女朋友嚟呀？」老細望住千惠講。
 
「講呢啲。」我同老細揮揮手就去咗睇漫畫，千惠跟喺我後面行。
 




行到某個架前面，我拎起咗本鬼滅之刃：「嘩！鬼滅之刃又出新一期，大哥真係死得好慘…」
 
平時我唔會咁on9對住本漫畫自言自語，不過為咗令千惠覺得無癮，我特登大大聲講。
 
佢咩都冇答，應該係話…俾唔到反應哩？
 
我加多兩錢肉緊：「係禰豆子呀！禰豆子鬼化真係好好丁！」
 
我偷偷望向千惠，佢個樣好似有啲不悅。
 




今舖仲唔係反感我原來咁毒？
 
我乘勝追擊，喺個架度拎起本咒術迴戰鳩噏：「伏黑惠真係好型，尤其是佢嗰招無量空處，一出唔知死幾多個…」
 
點知佢帶啲疑惑講：「你識唔識架？伏黑惠邊係用無量空處呀？伏黑惠用嵌合暗翳庭架。」
 
我窒咗一窒，最令我估唔到嘅係佢竟然有睇：「咩呀我講錯渣嘛！我係想講五条悟！」
 
「喂，你有冇睇劇場版呀？」
 




「梗係有啦！前、前傳嗰套吖嘛！話乙骨俾隻咒靈跟住吖嘛！」
 
實際上我睇都未睇過，淨係聽過吓。
 
佢居然搖頭嘆氣：「里香同乙骨係青梅竹馬，因為細個嗰陣乙骨睇住里香喺佢面前死，令到里香成為咗詛咒…」
 
我突然有啲唔忿氣：「呢、呢啲我梗係知啦！咁你知唔知涉谷篇嗰陣乙骨又會出返嚟殺死虎杖吖？」
 
「乙骨咁樣做係為咗…」千惠講講吓，突然俾老細打斷：「Hi，嗰邊兩位？」
 
我地一齊擰轉頭。
 
「請問你地劇透完未呢？可唔可以體諒吓我呢個動畫黨…」
 
正所謂劇透死全家，我同千惠即刻同老細道歉，跟手衝出漫畫舖。




 
「至衰都係你，搞到我俾老細話，以後買漫畫都唔知仲有冇折…」
 
「如果唔係你講錯晒，我都唔會忍唔住出聲啦。」佢有啲得戚咁講。
 
「得啦，唔夠你叻好未？」我望望隻錶，都仲有粒幾鐘，於是問：「跟住去邊呀？」
 
「都話你去邊我就去邊咯。」
 
「我就係唔知去邊吖嘛，你冇地方想去咩？」我反問。
 
「唔係冇，不過你應該唔會想去。」
 
「你想去邊呀？」
 




「都話你唔會想去咯。」
 
「我咩地方都會去，最怕你唔去。」
 
「咁我地行喇！」一不留神又俾佢翹實隻手。
 
行咗一陣我先鬆到手，順便拋一拋佢：「屌你再係咁我走架喇。」
 
佢放開我，遠離我一步繼續行。
 
「喂。」唔係咁易嬲吓嘩…
 
「而家咁樣得啦？」
 
之後，對面有幾個同千惠一樣校服嘅初中生走過嚟，經過我地隔離仲叫咗幾聲會長，千惠同佢地揮手。




 
「你學校啲人都幾有禮貌…」行遠之後我細聲講。
 
「都唔係吖，普通打招呼啫。」
 
「普通打招呼？你知唔知我頭先喺隔離諗起咩呀？」
 
「咩呀？」
 
「我諗起人地啲皇室出巡，然後啲平民喺度行禮。」
 
佢聽完笑咗：「你講嘢成日都係咁得意架？」
 
「明明係你自己笑點低…」
 




冇幾耐，千惠喺一間舖頭前面停低腳步。