【全劇終】《我喺街執咗個失憶嘅女仔返屋企》: 聯校宿營篇：新方向？抑或…

「痛痛痛！」右腳傳嚟撕裂痛楚。
 
「好彩羅同學喺度咋，唔係你就成個碌落山架喇。記住打交係唔啱架！」Miss一邊幫我包紮一邊講。
 
比賽完咗之後，我俾人送咗去醫療室。頭先羅凱撒撲埋嚟嗰陣，我一時失平衡向後仆，如果唔係佢及時掹返我入嚟，我就會好似Miss講咁成個碌落山。
 
雖然唔小心俾樹枝刮甩一層皮，不過冇命喪山卡啦都算係咁。
 
「貼好喇，你喺度抖吓先啦，我走喇。」
 




「唔該Miss。」我同阿妹一齊講。
 
Miss走咗之後，阿妹坐咗喺我隔離：「你搞咩呀？做咩無啦啦差啲跌落山架？」
 
「冇，係我自己唔小心啫。」
 
「你而家可以講未？你究竟喺邊度搵到我地學校支旗？之後又發生咗咩事？」
 
「你地學校支旗，咁啱俾小悠執咗。」
 




「咁你地唔係應該去終點？點解會同自己會長喺度打交？」
 
「因為羅凱撒知道啲嘢。」經過頭先一戰，我更加肯定。
 
「知道啲嘢？」
 
「嗯，」我點頭：「佢知道關於小悠嘅嘢。」
 
阿妹諗咗一諗：「所以你就用支旗嚟要脅佢？」
 




「唔係，支旗只係用嚟呃佢，由頭到尾都冇諗過交俾佢。」我解釋。
 
「但係，你地明明同一隊架喎？」
 
我搖頭輕笑：「我一早講過，我對乜野體育館冇興趣。」
 
由頭到尾，我會嚟呢個宿營都只係為咗小悠。
 
無論係一開始想阻止閃靈現象發生，抑或到後來想迫羅凱撒講出真相都好。
 
阿妹低頭諗咗陣，然後又問：「咁你最後有冇搞清楚啲咩？」
 
「條友講啲唔講啲，講咗等於冇講。」
 
不過，羅凱撒頭先仲講咗一句。




 
就喺我失平衡向後仆嗰陣。
 
 
「你同以前一樣，一啲都冇變過。」
 
 
「我今朝都話架啦，小悠一定係收埋啲秘密。」
 
我喺度諗，嗰一句究竟係咩意思。
 
「哥？」
 
明明我想知道嘅係小悠嘅事，而家又好似俾羅凱撒帶到一個完全冇關嘅方向。
 




「…咁宣佈咗邊面贏未？」我回過神，決定唔再諗住。
 
「未正式宣佈，不過我已經估到大概。」
 
頭先向後仆嗰吓，我順便將阿妹隊嘅旗飛埋落山。我諗就算羅凱撒有超能力都唔會搵到。
 
所以，結果應該同我預計嘅一樣。
 
「點解你要幫我地贏？明明你可以真係將支旗交俾佢…」
 
「我應承過你唔會俾你地輸架嘛…仲有，你地會贏邊關我事？我又冇幫過你地撕名牌。」
 
要我喺座爛鬼體育館同阿妹之間揀，唔使why not both，我一定係揀阿妹。
 
況且，總算喺羅凱撒口中知道少少嘢，距離尋回小悠嘅記憶應該近咗一小步（雖然我依然認為係原地踏步）




 
雖然我都係唔知點解佢地兩個尋晚會單獨出去。
 
等等，點解我要去在意…？
 
我開始慌亂，最後搵到一個理由俾自己：因為佢地夜晚獨處呢件事，同小悠記憶有好大關係，應該係…吖唔係，一定係！
 
呢個時候，有人敲咗兩下門，然後醫療室嘅門被推開：「晴晴，Miss叫我地集合喇。」
 
我同千惠對到眼，佢臉上揚起一抹意味不明嘅笑容。
 
「你行唔行到呀？」阿妹問。
 
「應該行到。」
 




「使唔使我扶你？」今次係千惠問。
 
「唔、唔使！」諗起頭先又俾佢乘機偷襲，睇怕唔可以再大意…尤其而家當住阿妹面前…
 
「咁快啲行啦？」
 
之後，我拐吓拐吓去到集合地點。