【全劇終】《我喺街執咗個失憶嘅女仔返屋企》: 聯校宿營篇：最後之戰（下）

羅凱撒剝咗件PE褸落嚟，摺好之後掉咗落地。
 
「我好耐未試過同人正面交戰。」佢一路講，啲手指一路啪啪響。
 
我梗係唔可以輸個勢，就係咁咦啪兩嘢。
 
「你準備好未？」
 
「唔好講咁多廢話，係嚟就快。」
 




佢嘴角一揚，以迅雷不及掩耳嘅速度衝到我跟前，然後秤住我衫領講：「如果我拎住刀嘅話，你一早就冇命。」
 
我一野甩開佢：「死開啦，有冇人同你講你真係好撚中二？」
 
佢奸笑一下，然後一嘢鏈住我拎旗嗰隻手。
 
「俾我。」
 
「…唔俾。」我死握住。
 




「唔想斷手嘅話，快啲俾我。」
 
「你夠薑咪鏈爆我隻手囉。」
 
雖然口係咁講，但羅凱撒真係好L大力，我要兩隻手用晒先暫時保得住支旗。
 
「哼，放棄啦。」
 
掙扎緊嗰陣，我用頭鎚一野撞過去，佢俾我撞到彈開幾步，眼鏡都飛甩埋。
 




我趁呢個機會再問：「究竟你知道小悠啲咩？」
 
佢慢慢執起地下副眼鏡，吹咗兩吓又戴返。
 
跟住，佢掩面大笑：「哈哈哈哈哈哈…」
 
正當我心諗做乜鳩嘅時候，佢講：「睇嚟，我要解放我真正嘅力量。」
 
然後佢鏈住自己手腕，噏咗一堆我聽唔明嘅日文，全程一直低頭。
 
「…屌你放過我啦。」睇嚟喺中二病程度上，我真係嚴重低估咗佢。
 
之後，佢一步一步向我走埋嚟。
 
我望吓隻錶，再俾佢揼波鐘落去，比賽就會結束。




 
所以，我決定開大絕。
 
我將支旗伸出出面，準備掉落山。
 
「屌！你唔要嘅話就算嘞！」
 
佢見到之後，面不改容咁講咗一句令我意想不到嘅說話：
 
 
「就算話俾你聽又點？」
 
 
我冇諗過佢發發吓中二病會將話題帶返嚟呢度，所以呆咗喺地。
 




「…你講咩呀？」
 
佢逐步走前，唔知著咗咩鞋，啲腳步聲好Q響。
 
然後，佢慢慢講咗一句：
 
 
「有時候，知道真相未必係一件好事。」
 
 
聽到呢句，我就知我冇錯，羅凱撒真係一個關鍵…
 
我雙手握成拳頭：「你真係知道啲嘢？」
 
佢無視我嘅提問：「就嚟夠鐘喇，差唔多係時候收拾你。」




 
「你唔好講啲唔講啲，乜嘢真相呀？」
 
「哼…」佢一支箭衝過嚟，準備將我撲喺地上——
 
 
「你同以前一樣，一啲都冇變過。」
 
 
喺失平衡之前，耳邊聽到嘅係羅凱撒呢句說話。