【全劇終】《我喺街執咗個失憶嘅女仔返屋企》: 聯校宿營篇：幸運四葉草

羅凱撒條仆街搶到旗，一定跑緊去終點，所以唔理阿妹喺後面點叫我，我都只係向前跑。
 
一定要喺中途截住羅凱撒。
 
我係咁跑係咁跑，忽然聽到有人叫我。
 
「阿、帆！」
 
我擰轉頭。
 




冇人。
 
明明聽到有人叫我。
 
「阿、帆！」
 
又嚟？
 
「上面呀。」
 




我岳高頭，小悠坐（正確嚟講係趴）咗喺樹上面。
 
「好學唔學學埋張廷宇啲嘢，你躝上去做乜呀？」
 
「我上嚟睇雀巢囉。」
 
睇嚟今次宿營發掘出小悠對大自然界嘅興趣…不過而家唔係講呢啲嘅時候！
 
小悠沿住樹幹落返地面，居然俾我見到佢個口含住隻木羹，左手拎住杯雪糕。
 




「點解你有雪糕食架？！」
 
「係老師頭先俾我嘅，仲有汽水架…不過飲晒。」
 
「老師？你個牌俾人撕咗喇咩？」我擰轉佢個身，發現佢真係冇咗個名牌。
 
「邊個撕你架？」應該只係啱啱嘅事。
 
「冇人撕我呀，係我求同我地一齊食晏晝飯嗰個女仔幫我撕架。」
 
原來小悠都想離開呢個地獄，不過…「點解我地求埋同一個人，但分別會咁大！」
 
「阿帆你都有求佢呀？」
 
「呢啲唔係求！係…送分！你做咩送分俾人呀？」




 
「因為我又熱又攰，又肚餓囉。」
 
我嘆一口氣：「你今朝啲鬥志去咗邊…」
 
「哈哈，我冇諗過會咁攰架嘛。」
 
「攰你又爬樹？」
 
「咁食咗雪糕，恢復咗少少體力吖嘛。」
 
「你又話有老師？老師呢？」
 
「我頭先話有啲暈，佢就好緊張咁話返去推架輪椅嚟喇。」頭先駱以雪明明得啲水同餅，小悠居然又汽水又雪糕咁，真係唔同老師唔同作風。
 




我返正題：「屌！點解我會喺度同你吹水架？！我趕住搵羅凱撒！」
 
「你搵佢做咩呀？」
 
「條仆街非禮阿妹，仲搶埋阿妹支旗…唉我唔同你講喇！」
 
準備起步時，小悠叫住我：「阿帆你講嘅旗…」
 
然後佢喺身後拎咗一支紅色旗出嚟，上面有阿妹學校名簡寫：「係咪呢支呀？」
 
我呆咗兩秒先回神：「係呀！點解會喺你度架？」
 
「我頭先喺地下執架，你要呀？」
 
「要！支旗對我好重要！」




 
「咁送俾你吖！」小悠講完將旗交到我手上。
 
「拎住隔離學校支旗都唔拿拿聲去終點，你個傻妹究竟知唔知個game點玩架…」我細聲吐槽。
 
不過咁即係話阿妹冇蝕底俾羅凱撒，而支旗又咁樣俾小悠執到，實在係天助我也。
 
等等，或者唔係個天幫我。
 
我喺褲袋拎返小悠今朝送嘅四葉草出嚟。
 
四葉草，咪就係代表幸運？
 
我摸摸小悠柔順嘅頭髮：「你真係我嘅幸運四葉草，錫晒你！」
 




小悠停止咗食雪糕嘅動作，眼定定望住我。
 
搞到我有啲怕醜，都係拿拿淋走人：「唔講喇，我趕時間。」
 
半響後，小悠喺我身後講：「阿帆，你要加油呀！」
 
只要有呢支旗喺手，我就可以迫羅凱撒講佢究竟知道小悠幾多嘢。
 
「嗯，為咗你，我一定會加油。」我緊握手中嘅旗幟，細聲回應。