【全劇終】《我喺街執咗個失憶嘅女仔返屋企》: 聯校宿營篇：籌碼

我大概整理一次，而家應該得返羅凱撒、小悠、千惠、阿妹同我五個人。
 
根據千惠所講，羅凱撒成個下晝都冇蒲頭，唔知喺度密謀乜嘢。
 
我擔心嘅係羅凱撒會對阿妹佢地做啲咩，而且我到而家都唔知佢懷住咩目的去接近小悠。
 
所以我想藉機會一次過搞清楚佢。
 
但係咁樣做嘅話，我首先需要有籌碼喺手。
 




如果羅凱撒執著要贏，咁我需要嘅籌碼明顯就係嗰樣嘢。
 
成功嘅話，我可以達到目的之餘，阿妹唔會俾羅凱撒有機會傷害到，而如無意外千惠更加可以贏埋今次比賽。
 
即係所謂嘅三贏。
 
不過，我要同佢地鬥快——
 
跑跑吓，突然喺樹林之間見到阿妹嘅身影，我即刻返轉頭。
 




「阿妹？」
 
佢走都走唔切，我梗係追上去。
 
阿妹跑得唔算快，不過係平均速度以上。要追住佢唔難，係截停佢呢吓要花啲力氣。
 
佢沿住大路一直跑，準備轉彎嗰陣，我醒起附近有條捷徑，應該趕得切截住佢。
 
我兜咗入小路行，穿過一堆草之後係個細嘅斜坡，可以見到阿妹跑緊過呢邊。
 




「三、二、一！」我心入面倒數，然後飛身一撲。
 
本來諗住啱啱好可以擋住阿妹去路，但計算上可能出咗差錯，導致我失平衡將阿妹壓咗響地下。
 
「嗚！」我慘叫一聲，因為情急之下用隻手墊住咗阿妹，所以好L痛。
 
阿妹對於我嘅出現應該未反應得切，我趴喺佢身上抖咗幾啖大氣。
 
耳邊突然傳嚟阿妹嘅淒厲叫聲，之後我俾佢一腳伸開咗。
 
「嗚！」我再次慘叫。
 
「你、你點解會喺度出現架？」
 
我坐低抖順條氣：「我嚟問你要啲嘢。」




 
「你想要我個名牌？」
 
我擰頭：「我想要嘅係另一樣嘢，不過我唔肯定係咪喺你度。」
 
「你講緊支旗？」
 
「係，但係我嘅目的唔係為咗贏。」
 
「唔係為咗贏咁你點解要？」
 
「我而家冇時間解釋，如果唔快啲嘅話，咁我嘅計劃就會失敗。」
 
阿妹諗咗一陣。
 




「支旗喺唔喺你度呀？」
 
「快啲講啦，就嚟冇時間喇。」我開始急。
 
「你點樣保證你冇呃我？」
 
「由細到大我幾時有呃過你？」
 
佢諗都唔諗就答：「有，你成日都呃我架啦。」
 
「總之，今次冇呃你！我真係好需要你支旗。」
 
「如果俾你之後我地輸咗咁點？」
 
「唔會。」我好肯定咁講：「信我，如果你俾支旗我，你地一定唔會輸。」




 
阿妹個樣開始猶疑。
 
我望一望周圍：「快啲，趁而家冇無人機影住，我地要爭取時間。」
 
阿妹望咗我一陣，之後就擰轉背挪高件PE衫。
 
居然，係收埋喺呢啲地方…
 
然後阿妹突然轉身：
 
「點解會咁架？支旗…」
 
「？」
 




「支旗唔見咗……」
 
「唔係吓嘩？！」我都震驚起嚟。
 
「點解會咁架…」阿妹個樣好似想喊咁，我即刻捉住佢雙手：
 
「你之前沿住邊度行過嚟？有冇見到啲咩人？」
 
我諗到嘅可能性有兩個，第一支旗喺中途唔知跌咗響邊，第二有人唔知幾時喺阿妹唔察覺嘅情況之下搶走支旗。
 
「我記得我見到你之前，唔小心撞過一次你地會長，然後我就一直跑一直跑…」
 
「屌你老母羅凱撒！」我嘅憤怒蓋過一切，搶旗嘅犯人一定係羅凱撒。
 
而且，阿妹將支旗收埋喺衫入面條仆街都搶到，即係話條仆街伸過隻手入阿妹件衫度！
 
我唔殺L咗羅凱撒我做佢契弟！
 
我冇理阿妹，轉身跑走。
 
「阿哥！你要去邊呀？」
 
「幫你打柒條仆街報仇！」