【全劇終】《我喺街執咗個失憶嘅女仔返屋企》: 一個人的遊樂園（上）

要我諗一個有好多魚嘅地方，我淨係諗到呢度。
 
可能太耐冇嚟，見到入場費之後我打咗個突，不過小悠已經一副急不及待嘅樣，加上入面有可能幫到小悠記返啲嘢，所以我用僅餘嘅零用錢買咗兩張入場券。
 
入去嗰陣，門口個職員滿面笑容同我地講：「祝你地玩得開心！」 
 
「…多謝。」我含淚回應，只係希望…今日嘅錢唔係白使。
 
一入到去，我就帶咗佢去水族館，我地由頂層行到底層；再由底層行返上頂層，期間我一直鼓勵佢去諗返多啲嘢，但係佢依然話咩都記唔起。
 




之後我地去睇熊貓、睇馬騮、睇樹熊、睇鸚鵡，結果都係差唔多——小悠睇得好開心，我企喺隔離只係覺得有啲氣餒。
 
「你自己喺度睇住先？我想出去抖吓氣。」行到昆蟲館嗰陣我講。
 
小悠掛住睇蜘蛛，求其嗯咗我一句。
 
我搵咗張長櫈坐低，一打開電話全部都係張廷宇嘅訊息，佢仲糾纏緊喺我同駱以雪之間嘅過節。
 
我費事再理佢，就去咗碌ig。碌碌吓發現珀奈嘅新post，係一張普通嘅風景相，原來珀奈趁半日假期去咗行山。我猶疑咗一陣，都係冇撳到like。
 




自從男廁嗰次之後，我地都未有機會見面，但就算見面，我都要諗吓應該用咩表情見佢。我唔係嬲，只不過一諗起自己會錯意，就唔知應該點面對佢。
 
算啦，或者時間會沖淡一切。
 
我見抖得差唔多，就返入去小悠，點知搵勻成間昆蟲館都唔見人，出門口等咗陣，都係唔見。
 
我即刻打俾佢，但係冇人聽。
 
個傻妹唔係盪失路吓嘩…？
 




不過盪失路算事小，我最怕佢係突然間閃靈，唔知閃咗去邊度。
 
我開始行遠啲搵，又去返頭先行過嘅地方睇吓佢喺唔喺度。
 
最後，俾我喺附近小食店搵返佢，原來佢去咗買嘢食。
 
「做咩行開又唔講聲？等我四周圍搵…」
 
「我見你好似唔開心，咪自己一個嚟買嘢食囉。」佢食住腸仔講。
 
「…我幾時有唔開心？」
 
佢無視我嘅反問，自己講落去：「係咪因為我咩都諗唔起，所以你唔開心呀？」
 
俾佢講中反而令我有啲內疚感：「…Sorry, 我唔應該迫你去記返起啲嘢。」




 
佢笑一笑：「我冇嘢呀，阿帆你咁落力幫我，我應該多謝你就真。」
 
「我應承會幫你架嘛，講呢啲。」
 
食到咁上下，小悠突然問：「不如陣間我地去玩過山車？」
 
「玩咩都得，但你要應承我唔好又自己行開，你知唔知頭先我以為你又閃靈呀？嚇得我…」
 
佢忍唔住笑：「點會呀？你之前唔係話閃靈現象只會喺我地分開好遠嗰陣先會有嘅咩？」
 
「所有嘢都係我估啫…況且本來用邏輯去分析一件咁冇邏輯嘅事，就已經好冇邏輯。」
 
「不過阿帆你覺唔覺呀？自從我開始返學之後，就冇乜點閃靈過。」
 




「你咁講又好似係…」
 
「所以證明你係冇錯架囉，因為返學之後我每一日都同你一齊。」
 
「又或者，其實你已經好返，唔會再閃靈。」雖然從來冇搞清過閃靈現象係咩嚟，但我假設佢係會痊癒嘅。
 
「咁我地試唔試吓？」小悠突然雀躍起嚟。
 
「……試乜野？」
 
「測試閃靈現象會唔會再出現。」
 
「…你嚟真？唔驚嚇死晒其他人？」
 
「又係你話嘅，咁多次閃靈你都冇見過我用啲會嚇親人嘅方式出現，即係我唔會嚇親人囉？」




 
我竟然駁唔到，而且今日樂園呢度唔算多人，的確可以一搏…
 
「…咁我地要點測試呀？」
 
「好簡單，你合埋眼數100吓，我就會有咁遠走咁遠，如果日落之前我地都見唔到面嘅話，就當閃靈現象已經消失。」
 
「咁如果我地真係咁啱撞到呢？」
 
「咁你就再數100吓，重新開始遊戲。」
 
點解有種玩緊捉依因嘅感覺…不過我居然覺得會幾好玩。
 
「準備好未？」說時遲那時快，小悠掉咗手上嘅竹籤後，就往前跳咗兩步。
 




「等陣等陣！」我拿拿聲合埋眼開始數：「1…2…3…4…」
 
「數慢啲呀！」
 
數咗一陣終於數完100，我擘大眼之後，小悠果然已經唔見咗。


如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！