【全劇終】《我喺街執咗個失憶嘅女仔返屋企》: 半日假期

上完上晝嘅堂，Miss崔宣佈放學，我先醒起之前通告話下晝要開乜鬼聯校宿營會議，所以今日全校放早。
 
我心裏祈求呢啲宿營最好有幾多整幾多嚟…至於難得嘅半日空閒，我決定搵個叫周公嘅人捉吓棋。不過首先要搞掂小悠個肚先，費事佢喺屋企摷唔到嘢食就摷我——我指係摷醒我。所以，放學之後我帶咗佢去食冬甩。
 
「拎住。」我買咗四個：一個俾自己，其餘嘅俾小悠。
 
佢好似前世未見過冬甩咁，食咗一啖之後雙眼發光：「好好食呀！」我觀察咗好耐，小悠每次食嘢都有90％機會出現呢個反應，我正考慮推薦佢俾電視台去拍飲食節目。
 
不過諗深一層，佢而家咩都唔記得晒，好多嘢未食過都係正常嘅。
 




經過隔離街間水族舖嗰陣，小悠又有新發現：「阿帆！你快啲過嚟睇吓！」
 
我行埋一睇，只係啲金魚喺度游嚟游去。
 
「有咩好睇？你未見過金魚咩？」
 
佢冇答，反而問：「你有冇試過養金魚呀？」
 
「冇，你知唔知最煩就係養魚？諗你都唔好諗，屋企已經有休比架喇。」
 




「做咩啫？我又冇話要養。」
 
「睇多兩睇你又話想養架喇。」以我觀察到小悠嘅個性嚟講。
 
「我應承你唔會養，你俾我喺度睇一陣？」小悠一面誠懇咁講，所以我都唔再講啲咩，就企喺度陪佢睇。
 
佢好專心咁望住啲魚游水，見到兩條魚相撞又會指住佢地叫我睇吓，我忽然諗到：佢失憶之前會唔會係一個好鍾意魚嘅人？
 
「阿帆你見唔見到游緊埋嚟嗰條魚呀？我記得以前…」個前字都未講完，小悠就合埋咗口。
 




不過我肯定我冇聽錯：「你頭先係咪話你記得以前？你記得啲咩呀？」知道小悠可能記返起啲嘢，我表現好激動。
 
但係佢隔咗一陣，就擰頭：「…突然間又唔記得喇。」
 
「你再努力啲諗吓？諗唔諗到？」
 
佢諗咗一陣，都係擰頭：「…我頭先可能講錯，我地去第二度行好唔好呀？」
 
難得小悠好似記得啲嘢，我點可以輕易放棄？睇嚟魚呢樣嘢係一個關鍵，一諗到識咗小悠咁耐總算搵到個突破口，我就成個人精神起嚟，就算叫我而家返去瞓都唔會瞓得著。
 
「不如我帶你去一個地方？嗰度有好多魚之餘，仲有好多好好玩嘅嘢。」
 
一聽到「好玩」兩個字，小悠即刻嗌好；而我嘅計劃就係帶佢睇多啲魚，睇吓佢會唔會突然記返啲咩。
 
所以，我地坐咗一粒鐘巴士，嚟到好日都唔會嚟一次嘅主題公園。






如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！