你是一名在戰場上的無名士兵: Real - 第二章 - 5
你衝到樓下，翻過櫃台，進到後面的房間。「等陣，我冇鎖匙。」係瞄着木門的門把苦笑。她破門而入，「咪住先，呢度全部都係水嚟 -」你退後，雙手頂住及腰、載住水的木盤。「廢話少講。」她一劍劈過來，你向右閃避，水盤破了後水不斷流出。「啊啊啊！！！」你看着沾濕的褲子，她已經完全失去了理智。
你愈走，她便斬斷更多的容器，房間的水已經及膝。「妳冷靜下好唔好？」你向左躲開她的斜斬。「...」她突然停下來，「點解我濕晒？」她在這間只有從接待處方向掛在上方的窗戶透進少許光線的儲水室大叫。「妳覺得呢？」你張開雙手，衣服上的水流到地上。
「對唔住啊巴奇。」她咬着自己的左手。「我原本想洗衫，依家連褲都洗埋。妳沖埋涼添，妳知啦，有錢人都係幾日先沖一次。」「我太衝動。」她的白裙變得非常薄，隨時都可以撕開似的。「不過我冇時間，都冇力，量去諗埋呢啲嘢。我哋應該點去水？」你還感到一陣麻痺。
「呢啲地方應該有個位將啲水沖去地下。」她「噠噠噠」地到處看，「喂你都快啲幫手搵啦。」「係係係。」你們踏着水尋找渠口。「入面發生咩事？」你聽到外面有人在喊，「喂！等陣！唔好入嚟 -」你還未說完，門便被一名士兵打開了。
水像海浪般被沖出去，連櫃台也被推爛了，「涮」一聲地把門外的十數人也一同擊倒，激流甚至把旅店外的地面也弄濕了，而旅店內則像一個小水池。「大鑊！」你衝出門外見證慘況，「大家有冇事？」「巴奇，唔係，副隊長，你搞咩？」一名士兵吐出口中的洪水後說。「唔好意思咁多位士兵大哥，係我做嘅。」雪倫夾着身子走出來。
「小姐，其實呢，」另一位士兵正想破口大罵時細心地打量了你們，「哦~我明白喇。其實呢，你哋想做嗰啲嘢冇問題，但可唔可以唔好整爛晒啲嘢？」「對，對唔住......」她眼泛淚光地說。「妳知唔知道歉嗰陣要做啲咩？」又另一名士兵說，他們全部以全身濕透的姿態站起來。「你，你哋想做咩？」她慢慢退後，「副隊長，請恕罪，但我哋要請你哋去搵隊長傾下。」他們向你們迫近，「喂，等陣，等陣！」你和她都被迫至牆邊。
「副隊長，可唔可以說明一下發生咩事？」隊長、你和雪倫坐在兵營的一間單獨房內，「隊長，對唔住。」你向坐在對面的隊長用仍在滴水的上身彎頭。「咁啫係發生咗咩事？」他嚴厲地說。「啊，啊......」你極度恐懼地把頭轉到雪倫的方向，「羅傑斯隊長，真係好對唔住，所有嘢都係我搞出嚟！」她站起來九十度鞠躬。
「咩，咩話？」你震驚地說，你本以為她會指控你，但她反而把全部責任放在自己身上。「巴奇副隊長原本想睇下我起咗身未，但我一時太激動，追住佢嚟打，最後搞到咁，但無視咗佢嘅一番好意。」她把身體彎得更曲。「我好好奇睇下妳起咗身係咩意思。副隊長？」「呃，」你在想方法回答的時候，她在隊長看不見的位置用面部動作叫你不要說出真相，「因為雪倫小姐尋日都幫咗我哋好大嘅忙，所以當隊長你叫我參加會議嗰陣，我咪順便睇下佢需唔需要幫手。」你裝作理直氣壯地回答。
「但係你哋搞成咁我好困擾。」「對唔住，我哋兩個會執返好佢。」你說。「戲水鴛鴦。」「等陣隊長你講乜嘢，」「我同佢唔係咁嘅關係，」「冤枉啊，」「佢成日亂咁嚟，」「妳講咩話？」「冇，我冇講嘢。」她坐下來，「啊哈哈，我講笑啫。不過一定你哋要執返好。」「知道。」「遵命！」
「副隊長，你套衫我幫你搵人洗好咗。你換返請即刻過嚟開會，已經比預期遲咗好多。」「請恕罪。」「得喇，你哋出返去整返乾先，啲味好臭。」隊長把你們叫出去。「我冇着鞋。」你們站在幕前踏不出去。「啱啱都係冇人敢掂妳，所以變咗我揹。」「等陣先，咁你咪 -」「輕得嚟又幾軟。」「可以好似你咁無恥咁講呢啲嘢嘅人我都係見過幾個。」「咁妳着我對靴囉。」「我，我冇問過。」你在脫掉濕如泥土的靴子後，她甚麼都沒有說就穿上。
「咁我返去清理先，你去開會就得。」你們走到分支路，她往旅館的方向走，你則去換回護甲。「我好似成年都未試過乾身咁。」你在擦乾身體，裝備好後在外頭伸了個懶腰。「咁係時候去開會。」
你去到軍營，發現已經有包括羅傑斯隊長的幾個軍隊高層在開會。「下官萬分抱歉。」你在踏進會議室時單膝跪下，「唔使喇，起身啦。」隊長說。「係！」「但係呢個人連鞋都冇着......」一位軍隊高層說。「嘢唔係咁講㗎艾安，一個人嘅實力唔可以喺外表就睇到出嚟。」另一位高層說。「的確係。意歷當你有咩睇法？」
你站在這裏看四個人不斷評論自己，「我好認同普頓嘅講法。」意歷當說。「遼創兄呢？」普頓問。「我認為要睇下佢跟住落嚟講嘅嘢。」「咁啫係我哋四個意見一致啦。」艾安說。
你覺得四位高層有種異常的默契，而且令你難以啟齒。艾安是四個之中最強壯的，應該是正面實力最強；意歴當比較瘦弱，但速度應該極快；遼創看起來很文靜，但動手起來應該講求一擊必殺；普頓
是四個人中最平衡的，應該是領導者？「依家請人定點？點解可以每個人都咁唔同？啲名又好似亂改咁？」
不只如此，艾安滿臉鬚子，且看起來精力充沛、意歷當的臉很乾淨、而且充滿殺意、遼創的頭髮差點把雙眼掩蓋，而且他每時每刻都在觀察周遭情況、普頓和你差不多，不過四人的共通點就是和隊長差不多年紀，甚至還要老一點。「唔使打仗啦，你哋四個應該都可以自己打一座城。」
「好啦各位，我明白你哋對副隊長有懷疑。但佢立嘅功係無可置疑嘅。我哋都係開會先。」隊長停下了四個人的對話。