女神老細係我女朋友: 第五十五章
一出到去，同事個個都即刻散開晒，好似𥄫野俾人知道咗咁，我拖住景霖，望到佢好似面都紅晒咁，又難怪嘅，眾目睽睽之下公開我地嘅關係，仲要係作為公司平時咁強勢嘅老闆，俾著我都怕醜。
我攞咗個箱同景霖翻咗入老細房，今日係佢最後一日坐係e間房，聽日都唔知點算。
「嚟啦，我幫你執。」我一入到房就同景霖講，希望佢轉移注意力落去第二到，景霖都點咗兩下頭。
景霖放係老細房嘅私人野唔多，我地兩個人好快就執好，執完就啱啱好食晏時間，所以我趁住有時間就叫埋全叔車景霖翻屋企先。
「你翻去先啦，今晚放工我再過嚟搵你啦。」臨上車前我同景霖。
「嗯。。。但係我而家要住邊？我其實話租房嗰啲乜都未搵。。。」景霖係車到問我。
「你話呢？翻去有時間執埋啲嘢，我今晚帶你去搬屋。」其實我都估到佢乜準備都冇做，所以啱啱執野嗰陣一早同阿媽講定景霖會嚟我屋企住一排。
「麻煩全叔。」我講完就順閂埋車門，隔住車窗我見到景霖一臉問號咁望住我。
食完個飯翻上公司，好多同事包括細強都埋嚟問我啱啱發生咩事，搞到野都做唔到要逐個打發佢地走，一路望住時間等放工，一放工即刻打卡落去搭巴士去景霖屋企。
「叮噹」我撳響景霖屋企嘅門鐘，之後屋入面就轉嚟一陣急促嘅腳步聲加上好雜物同衫掉落地嘅聲，幾秒後景霖先打開道門。
「嘩，你冇野啊嗎。」一打開門，我就見到間屋亂到不得了，睇嚟景霖成個晏晝都係到執野，不過我諗佢執到嘅都冇幾多，同埋佢仲係著住今日翻工嘅衫。
「冇啊，都執得七七八八啦。」景霖手上面仲拎住幾條褲，逞強咁同我講。
「真係？」我拮高腳扮偷睇屋入面嘅情況。
景霖冇應到我，只係報以一個扁嘴嘅表情俾我。
「哈哈，講笑咋，嚟啦我幫你執啦，阿媽仲等梗我地開飯㗎。」我摸一摸景霖個頭同佢講。
「吓，你諗住帶我去你到住？」景霖瞬間從扁嘴轉為驚訝嘅表情。
「係啊，你又未搵到地方住，我都唔可以突然變間屋俾你㗎係咪？」我一邊摺好景霖嘅衫一邊講，景霖就好驚訝咁停晒手望住我。
「做咩啊？」我見景霖停晒就問佢咩事。
景霖又係咩到冇講，但係今次佢冇扁嘴，只係靠過嚟攬住我，都識做咁停手攬翻景霖。
「嚟啦，快啲啦，唔係翻到去阿媽煮啲餸就凍晒㗎啦。」我輕輕拍一拍景霖同佢講。
「嗯。」景霖微笑住咁應我。
大概執咗九個字，終於將所有野收晒落個喼到，雖然大部分都係我嚟執，搞到我身水身汗。
「伯母同世伯知唔知我嚟住㗎。。。」景霖係我正想開門嘅時候拉住咗我隻手。
「梗係知啦，我一早講咗啦。」
「咁我會唔會煩到佢地㗎。。。」景霖又問。
「唔會啊，佢地.....」我話都未講完門就打開咗啦。
「唉呀，你兩個仲咩企係門口到傾計都唔入嚟啊，快啲入嚟先啦，嚟我幫你拖個喼入房先。」阿媽一手攞過我腳邊個喼就推咗入我房，我就用個「嗱，都話啦嘅」嘅眼神望住景霖。
「阿仔啊，你去攞條毛巾啊牙刷嗰啲俾景霖啊。」阿媽係房到叫我，睇嚟佢對於景霖嚟住一事覺得好開心。
「哦。」我隨即攞晒要用嘅野出嚟。
「嚟啦坐低啦，食得飯㗎啦。」阿媽係房到走出嚟之後同我地講，之後就揭開抬面上面冚住咗嘅碟同入廚房攞飯。
「阿媽我幫你啊。」景霖都好似唔好意思俾人招呼咁多，就入廚房幫阿媽攞飯，我就終於有得坐低抖下。
「景霖真係唔話得。」
「小小事姐。」
「衰仔，唔入嚟幫手仲要景霖攞。」阿媽一出到嚟就話我。
我翻咗成日工，仲要執咗成粒鐘野，抖下都得掛。。。
當然，我冇講出嚟。
食完飯之後我坐咗陣就去咗沖涼，因為真係好攰。
「總之你當自己屋企得㗎啦。」一沖完涼出嚟就係房門口見到景霖同阿媽係我房到傾計，睇嚟景霖對於要係到住落都冇咁怕醜。
「我入去洗埋啲碗先。阿仔，埋嚟陪下景霖啦。」阿媽隨即就入咗廚房。
「點啊，阿媽同你講咗啲咩啊。」我入房同坐低同景霖講。
「冇啊，阿媽都係叫我自然啲，當自己屋企咁咋嗎。」景霖一邊開喼一邊講。
「阿媽？」我扮到好驚訝咁問景霖，不過我其實一早知。
「伯母啊。」
「阿媽你叫㗎咩。」我冇理到，只係靠咗個頭埋去，見到景霖有啲面紅。
「Hehe，講笑咋傻妹，沖涼先啦，我執啦e到。」
「張志明，你。。。！」景霖又嘟起個嘴同望住我，不過好快就俾我輕輕一吻收咗聲。
「景霖啊，熱水得啦，沖過涼先啦。」阿媽係廳到叫景霖。
「唔該阿媽。」景霖係房到回應。
「下次唔俾你錫啊。」景霖扮到好嬲咁拎起啲衫入廁所，但係其實我見到佢嘴角係忍唔住笑咗出嚟。
就係咁，景霖一下由我老細變成我女朋友再到同我同居，其實我一早就察覺到景霖做老闆做到好大壓力，但係我一個打工仔又幫到啲咩，雖然我唔知接佢嚟我到住咁樣做係好定唔好，但係起碼景霖開心過已前先，咁樣對我嚟講已經夠。
一邊執嘢一邊諗，話咁快景霖就沖完涼出嚟，時間都唔早，我已在攰到攤咗上床。
景霖冇幾耐都吹完頭入房上床。
景霖擰過身嚟望住我。
「做咩啊？」我都望住景霖。
「冇野啊，望下你。」
「咁早抖啦」我一面疑惑咁回應，隨即就合埋咗對眼。
「我愛你。」我隱約聽到景霖細細聲同我講之後，俾佢錫咗啖。