女神老細係我女朋友: 第三十六章

我放低手上嘅公仔麵出去客廳睇下係邊個嚟咗，一出到去，見到一個女人拖住個大篋行入嚟景霖間屋，睇落都係四五十歲到，keep得好好，同景霖有幾分相似。


「媽咪？」景霖係梳化叫個女人。


「媽。。。咪？姐係伯。。。母？」我望住眼前嘅女人，驚訝咁望住佢。


「景霖，e個邊個嚟㗎？」伯母有啲盤問嘅語氣問景霖。






「佢係我男朋友。」景霖語氣都瞬間變咗咁。


「男，朋友？」伯母上下打量住踢住拖，著住條瞓覺短褲，笠住件底衫當面衫嘅我。


「你好啊.....伯母。我叫張志明叫啊，你叫我志明得㗎啦。」我摸住個頭咁同伯母打招呼，我第一次見景霖阿媽嘅情景竟然係咁，我都有啲唔好意思。






「嗯。景霖，一陣入嚟，有野同你講。」伯母好冷淡咁應咗我之後就拖住個篋行入走廊，攞條鎖匙出嚟打開一直鎖住嘅房門。


「咩。。。咩事啊？伯母見到我好似唔係咁開心嘅？」我行過去同景霖細細聲咁講，廢事伯母聽到。


「冇嘢㗎，佢係咁㗎，我一陣出嚟同你解釋啦。」景霖用安慰嘅語氣同我講然係錫咗我一啖就行咗入伯母間房，淨低我一個完全唔知發生咩事企咗係到。

———————————————————————




黃景霖


「媽咪，做咩翻咗嚟嘅？」我入到房第一句就問媽咪。


「我見咁耐冇見你，咪翻嚟睇下你點囉，點知一翻嚟就見到你個男朋友。」媽咪好似對阿明有啲唔滿意。


「佢唔係Edward，佢唔會𠱓我，同埋佢真係對我好好。」


「我唔理佢係咪咩Edward阿咗，你上次仲俾你出面識嘅男朋友𠱓唔夠，我蝕唔夠咩？」媽咪開始有啲嬲。






「阿明佢只係我員工嚟，佢唔會做啲咩㗎，我對佢好有信心。」我都開始為媽咪對阿明嘅態度感到唔滿意。


「我唔理啦，總之有咩後果你自己負責，媽咪唔會再幫你，如果再有咩事，間公司我會收翻自己搞。」


「仲有你個男朋友，我勸你都係儘早撇甩佢，你想拍拖，媽咪仲可以介紹你識啲好男仔。」



「你姐係話阿明係.......我保證阿明唔會。」為咗唔同媽咪鬧交，我都係完咗個話題算。


———————————————————————
張志明






「我走啦，約咗人飲夜茶。」我聽到伯母打開房係走廊到行梗出嚟，我聽到伯母把聲都坐翻直個人。


景霖隨住伯母係走廊行出廳，景霖個樣好似有啲唔開心，雖然我好想立刻問景霖咩事，但係伯母好似唔係太鐘意我，所以都係等佢走咗先。


「拜拜啦伯母。」我好生硬咁同伯母講再見，伯母都淨係嗯咗聲就走咗。


「咩事啊景霖啱啱？做咩你同伯母好似鬧交咁嘅？」見伯母走咗之後，我即刻行去帶景霖係梳化坐低。


「媽咪佢話佢唔信你，你會𠱓我。。。。」






「唔信我？我𠱓你啲咩？」


「都係因為我前男友。。。。都係因為我太易信人。」


「嗰個Edward?」


景霖點咗下頭。