女神老細係我女朋友: 第十章
竟然要去老細屋企？先唔講我第一日翻工，佢仲要係我老細，而家仲要去佢屋企，唔會係係老細屋企過埋夜啊。
由我屋企樓下駛去老細屋企都係唔洗十分鐘車程，好快就到咗，不過去到都成9點幾。司機阿全將七人車駛入去一個私人屋苑嘅大門口前，老細果然係有錢人，住嘅地方都唔同啲嘅，一睇就知e到啲樓價唔平，係車入面都見到個大堂啲裝修好靚仲有好大張保安枱。
「好，到啦小姐，晚安。仲有細佬啊，哈哈。」老細個司機阿全似有深意咁同我講咗聲。
「你係到等我，我落車打個電話。」老細打開門落行埋咗角落頭。
睇嚟老細係打俾個客，見到因為我推遲，我都有啲慚愧，但係一個打工仔又做到啲咩，我都係乖乖留係架車到撳住電話等算。
「喀喀」突然有人敲我隔離嘅車窗，原來係司機阿全，佢手勢示意我落車。
還掂都冇野做，落車抖啖氣都好，我隨即打開我身邊到車門落車。
「食煙嗎你？」司機阿全從褲袋攞出一包煙撜出一支俾我。
「唔食㗎我，多謝啦....」
佢叫我唔食，隨即用口擔嗰支煙點起嚟食。
「咩名啊細佬？」
「叫我阿明得啦。」
「阿明仔下話，你叫我全叔啦。」全叔口中吐出一口煙。
「你好鐘意阿景霖㗎？」全叔語帶輕挑咁問我。
「景霖？你話老.....老闆？！」我被佢突如其來一句嚇親，啱啱嗰個零鐘車程都睇得出？
「冇......冇啊，我今日第一日翻工，佢只係我....我老闆咋嗎....」
「唔洗扮啦，啱啱我睇到晒你𥄫景霖𥄫到實一實，又唔敢噪醒佢，哈。」又吐出一口煙。
「景霖佢我由細睇到大，細細個就成日去佢老豆公司玩，當年佢老豆請我嗰陣佢都係得嗰十零歲，佢就好似我半個女咁，唔經唔覺佢都廿中啦，佢識嘅人我都見過晒咁濟，不過男嘅又真係冇乜幾過，你算好彩啦。」
『原來老細都係得嗰廿中咋？！』
「我真係冇......」我急忙想解釋。
「景霖佢老豆早死，得翻佢老母，又係美國嗰邊住梗。幾年前景霖接手間公司，睇住佢日忙夜忙，係香港e邊通冇乜邊個同佢親，我平時又忙，唔係太照顧到佢。」全叔好似冇聽我解釋咁，一邊食煙一路講。
「全叔我都後生過，點會唔知你條靚仔諗咩啊。」全叔拍一拍我個頭。
「所以老闆啲性格先咁.....」我都冇謂隱瞞，打探起老細啲背景。
「景霖佢好少對人咁好㗎，平時一去到公司附近就頓起塊面，我都要叫翻句黃小姐。唉，都係因為佢老豆早去。你今日第一日翻工，梗係做過啲咩啦，搞到景霖仲帶埋你翻屋企，執到啦靚仔。」全叔吸埋最後一啖煙一手彈支煙頭埋面前個煙灰缸。
「全叔我都睇得出你都係個正人君子嚟嘅，我都放心，好好地對景霖啊，如果唔係，我斬獲你㗎。」全叔舉手扮作把刀，作勢劈落我到，我都俾佢嚇到縮一縮。
「張志明，你跟我上去。阿全麻煩晒你，聽日見。」此時老細都講完電話，隨即行過嚟‘命令’我。
「拜拜黃小姐。」全叔逕自上車。
「係，老闆..」我都緊緊尾隨老細走入大堂。
「上啊明仔！」我隱約聽到全叔從車窗細細聲咁叫我。