女神老細係我女朋友: 第八章
「哇！Di...」我件白恤衫同條褲俾老細杯咖啡倒到濕晒，搞到黑到成大笪，條褲濕嗰個位啱啱好仲好似瀨過尿咁，最大鑊嘅係，杯咖啡沖咗冇幾耐仲係熱嘅，辣到我係張櫈到成個彈起，本來都想大叫聲屌，但係係老細面前，我都係忍住咗，廢事老細以為我想鬧佢
同埋老細咁靚，點鬧得落啊。
「對....對唔住啊，等....等我幫你....」老細少有嘅被嚇親，語氣都變埋，佢野都未講完就即刻攞起啱啱我俾佢嗰包紙巾繞過張枱過嚟我嗰面。
「唔......唔洗啦老闆，我自....自己嚟得㗎啦！」老細突然沖埋嚟嚇親我，我即刻舉手示意唔需要幫，但係佢已經踩住高踭鞋喀喀聲咁埋到嚟揼低頭幫我抺梗件恤衫。
「係我唔小心.....等我嚟啦....」我從來未見過老細咁驚青，仲要同我道住歉咁抺衫，話雖我今日第一日翻工姐，仲要係OT，估唔到會發展成咁......
「都係等......」
「唔好郁。」老細突然叫咗聲，仲要用平時嘅語氣講，我當堂唔敢郁。
之前講過老細矮我一個頭到，我而家企e個位置，加上老細揼低頭，我見到老細薄薄白tee透住佢背脊，白雪雪嘅玉背，加埋約隱約現嘅黑色Bra帶，真係冇乜邊次機會可以咁樣接近老細，哇真係俾佢倒瀉成壺咖啡都抵，而且因為老細同我好近，我又可以索到佢嗰陣玫瑰香水味。
『哇，正啊，有個靚女同我咁近距離，仲要幫我抺梗件衫，辣到熟咗都值啊。』作為職業毒撚嘅我，做人咁耐都冇乜女性緣，莫講話靚到咁嘅女仔，連普通女仔都冇乜接近過我。
正當我係到享受梗扮唔好意思嘅時候，我感覺到老細停咗手，我低頭一望，原來佢已經抺完我件恤衫，差我條褲仲濕咗嗰笪，個位置仲要啱啱好係嗰到。。。
「等我嚟啦。」我伸手問老細攞過張紙巾，示意我自己搞掂條褲，雖然話想抽下水姐等佢抺埋佢，但係點都係我老細，要有翻條界嘅。
老細聽到後好尷尬咁抽咗另一張紙巾俾我。
為咗化解e個尷尬嘅場面，我諗我都要搵下野講，搞到好似淨係老細企係到咁望住我抺褲都唔係幾好意思。
「老闆你......成日倒瀉咖啡㗎？」我望住掛係到老細污糟咗嗰件西裝褸一路抺一路笑住咁問