女神老細係我女朋友: 序章

「唉，會唔會又食白果......」今日係我搵工最後機會，其他公司都叫我翻去等消息，唉。5月嘅香港熱到我想死，晏晝著住成套西裝係條街到行直頭係折磨，但係我睇一睇手上隻錶，上面嘅兩支針同我講唔俾我有放慢半步嘅一思念頭，再唔行快兩步就要遲到個interview，由頭濕落腳趾尾嘅我捉緊手上見工嘅資料快步穿過行人。


『呼，終於到啦。』我走入商業大廈嘅大堂，風閘嘅風加上大堂嘅冷氣令我感到一陣釋然嘅感覺。


「你好，想問XX公司係幾多樓啊？」我有啲上氣唔接下氣咁問大堂保安我要見工嘅公司係邊。


「哦，7樓咋嗎，嗰邊搭2號𨋢上去啦。」保安從報紙後遞隻手出嚟指住我後面。




「唔該。」我快步行過去撳𨋢，好彩唔係上到太高，一分鐘內應該落到嚟。


「黃小姐，午安啊，今日咁晏啊？」


「係啊田叔，叫我景霖得啦，今朝有啲野做啊嗎，所以咪放咗自己半日假囉。」一把親切又不失儀態嘅女聲回答大堂保安嘅問候。




我向門口一望，大堂保安係到同一個女人打招呼，睇嚟係到翻工嘅人。


個女人行到2號𨋢口停得咗，睇嚟係搭同一部𨋢，佢行過嚟嗰陣掀起嘅一陣風中我隱隱聞到一陣淡淡嘅香水味。


「Mmm,好香玫瑰味。」我輕輕一索，一陣淡淡嘅玫瑰味係我鼻中擴散，啊屌，唔小心講咗出嚟，不過好細聲，應該聽唔到掛，e一刻嘅我直情想搵個窿匿埋，會唔會俾人當變態佬，愈諗我愈驚，而部𨋢都啱啱到咗。




果然係同一部𨋢，我率先走入部𨋢到撳咗7樓，然後搵個角落企埋一邊，個女仔排我後尾隨住我入𨋢，我用眼角稍稍偷望下個女人，希望佢唔好話我非禮，我甚至覺得佢入𨋢嗰陣會睥住我。


『好靚女....』我心入面既刻彈咗句。


我本來諗住眼角偷望下，矮我半個頭到，扎住條短短嘅小馬尾，一條長長嘅留海啱唔好到下巴，眼大大，標準鼻型，個嘴搽有淡淡嘅唇膏，有化妝得嚟又自然，原本我諗住偷睇一下，但係真係太靚，我忍唔住望到個人定咗。


佢轉身向𨋢門前忽然抬高頭望我，我地兩個眼神就一刻接觸咗，我嚇到即刻擰轉面扮冇事。


『佢應該睇唔到掛，我唔想俾人當變態啊。』
眨吓眼就到咗7樓。




「唔該借借。」我叫前面嘅人借開俾我出𨋢。


「唔該。」佢同我同步講出，只不過佢語氣同啱啱係大堂就好似兩個人一樣，十足十霸道總裁咁。
唔係掛，佢竟然同我停同一層！？希望唔係同一間公司啦，我就嚟驚到震，我啱啱啲行為正常人都當我癡線。


我尾隨住佢出𨋢，一出𨋢我就搵到我嚟見工嘅公司。咪住，佢好似同我行緊去同一個地方......
果然係，我仲要一出𨋢就跟住佢咁，死啦佢一定誤會我係。。。


去到門口我特登退後一步，廢事真係誤會我係跟蹤狂。佢係個Hermès手袋入面攞咗張員工證出嚟開門，哇，唔會係大粒野掛。




因為佢開咗門，我鐘都唔洗撳就入咗去。
「黃小姐，午安，今日你約咗......」一個應該係秘書嘅女員工行出嚟迎接我前面嘅黃小姐。


「嗯，我入房先。」黃小姐有啲冷酷咁答。
我有啲呆咗咁企咗係門口望住佢，可能係太尷尬，又或者我淨係想望多個黃小姐兩眼，因為佢真係好靚。


「先生？」Reception嘅叫聲叫醒咗我咁。我急急腳咁行過去「我係嚟見工㗎，唔該。」我遞上手上嘅信。「想問呢，啱啱個黃小姐係邊個嚟㗎？」我同Reception八卦下咁問。
「佢咪我地老細囉。」


「老。細？」