一個香港留學生在美國的生活: 改變

自從Heather同Anita見面之後，佢成個人變得沉默咗，笑容都少咗好多，雖然Heather早就估到Steward響外邊有其他女人，不過自己親眼見到又唔一樣。  

「仲係唔開心？」抱住Heather瞓響佢同Steward 張大床上面，我一邊撫摸住佢嘅長髮問佢，Heather「我冇唔開心，佢有佢玩女人，我咪一樣有你陪我，只不過我估唔到佢玩過唔止一個，十個，而係上百個！我只係上百個嘅其中一個！我以為我係佢老婆會唔同，結果都係佢其中一件玩具。」「Anita講咗啲乜嘢你知？」「我睇咗佢電腦入面嘅videos，你知唔知道，Anita住嗰間屋先係佢個竇，佢最重要最秘密嘅嘢都收響嗰度，我住嘅呢間屋只係佢做樣嘅家，既然係咁，做乜同我結婚？我除咗Steward之外，只有結婚前兩個男朋友，同你一齊係因為發現佢響外邊有女人，不過我以為係一兩個，冇諗過佢咁賤格由婚前到婚後不停咁玩唔同女人，迷姦落藥拍片乜都齊。」「我哋依家咪報復緊佢囉！」Heather突然之間起身著衫，「半夜三更，你做乜呀？」「陪我出去呀？我想遊車河。」「十二點幾喎，你想去邊？」「去邊都好，唔想再瞓呢度，你唔行我自己行！」「好好好，我陪你！」  

Heather可能真係受咗太多刺激，佢竟然著咗件冷衫加短牛仔裙長靴羽絨長褸，入面係完全真空連Bra都冇帶！我認識嘅Heather係從未咁著過！落到停車場，本來Heather話要佢揸車，我堅持反對之下，最後由我揸。十一月初三藩市夜晚氣溫只有五十度左右，加上風大，感覺上更加凍，Heather要我開車去到Cliff House岸邊停咗架車，對住漆黑一片嘅太平洋，，「我唔可以離開Steward。」Heather突然之間爆句咁嘅嘢，我唔知點回應，「我父母同Steward屋企係世交，生意上有好多來往，關係非常複雜，早幾年我爸爸生意失敗，全靠Steward屋企幫手先渡過難關，仲欠咗佢哋好多錢，我嘅綠咭身份其實都係靠Steward，如果離婚，我將會一無所有，仲會連累父母。」「我以為你同Steward係響Stanford認識？」「嗰陣時啱啱識你，冇講哂所有嘢畀你聽，其實我好細個已經認識Steward，不過冇乜交往，直至響Stanford讀書先開始拍拖，跟著咪結埋婚囉，其實我份工都係靠佢嘅關係，如果唔係你以為張綠咭咁易申請？」  

完全係大台連續劇嘅劇情，估唔到會畀我碰到，「如果畀Steward知道你同我嘅關係，咪好大鑊？佢會唔會主動同你離婚？」「佢早就懷疑，不過唔肯定，所以先要我搬去London。」「咁你打算點？我哋唔再見面？」「點解唔再見面？佢可以玩女人，我唔可以玩男人？我仲要盡情玩盡情享受，佢屋企咁要面，唔會咁易離婚！」估唔到變成我被佢玩！「咁你依家玩夠未呀？呢度又黑又凍！」「你車我落酒吧，我要玩大佢，我要報仇，玩盡唔同嘅仔！」「小姐，咁我點呀？你玩我陪你玩，你都唔洗隨便通街搵個男人過夜吖！」  

相對無言，過咗陣，Heather「唉，返去啦！講笑姐，我癲完啦，多謝你陪我。」