一個香港留學生在美國的生活: Labor Day （2）

十五分鐘路程，好快就到，我同小諾推住架Shopping Cart，Supermarket門口放咗大堆50lb一包嘅炭，仲有一箱箱火爐燒嘅木，我一手一代揪咗兩袋炭放上桇Shopping Cart「嘩！你都好勁喎！好彩你同我嚟啫，如果唔係咁重一袋，我肯定搬唔郁。」「咁我平時都有玩吓健身，又係男仔，自然大力啲，如果唔係都唔使我陪你哋買啦！」「我成日叫阿成去健身佢都唔去！」「仲有冇其他嘢買呀？冇就返去啦。」「我想買兩支酒，Joe屋企啲酒都唔好飲嘅！」「佢嗰啲酒唔啱女士飲啫，唔係唔好飲，支支都靚嘢嚟㗎 ！睇唔出你鍾意飲酒喎，你鍾意飲邊類型嘅酒啊？」「有冇啲甜啲嘅酒啊？Lisa Candy 佢哋都投訴冇乜啱女仔飲嘅酒。」「我揀兩支俾你哋幾個女仔飲啦，包你話好飲！」Safeway嘅Wine selection算唔錯，中低價位，走大眾化嘅路線。我行咗一圈，揀咗一支Napa產嘅Riesling同Muscat，廿蚊左右一支，都係比較帶甜味適合女仔飲嘅酒。  

「阿成完全唔識酒，更加唔會飲，我都係平時同你地一大棚人去玩先有人陪我飲。」「咁你好鍾意飲飲食食喎。」「都幾鍾意㗎。」開車返嚟嘅時候，同小諾傾咗好多嘢，對佢同阿成又了解多咗好多。阿成同小諾都係加拿大人，家人都移民晒去加拿大，佢哋兩個都係加拿大讀書嘅時候認識，同一間大學，阿成而家係響一間Software Company做Engineer，小諾就響Big 5做，等做夠Hour去考CPA牌。「咁你哋而家住響邊？」我開始有啲八卦咁問，「我哋住響Sunnyvale，仲係租緊Apartment，儲緊錢準備買屋，係喎你好似係做地產㗎喎，有冇好介紹呀？」「買屋呢啲嘢你最好就問吓Joe，佢先至係專家，跟佢買實無死。」  

講吓講吓已經返到屋企，一入門口已經聞到好香嘅BBQ味！「你哋返咗嚟啱啱好，啱啱用完最後一舊炭！Joe同David響後花園大叫，我就同阿Joe講「我哋順便買咗兩支甜啲嘅酒返嚟，不如你過嚟開酒，我接手燒啦！」「買乜嘢酒啊？我屋企最缺嘅就係酒！等我睇吓你買咗啲乜？有冇搞錯啊？買啲咁cheap嘅酒！」「我見你屋企得啲Cab同Pinot，咁重口味，女仕唔啱飲！」「屌！你唔問我更係唔攞出嚟啦！」Joe轉身去咗廚房後面條落樓下地牢樓梯，原來佢間屋起咗個地牢做Storage，我都未落過去，過咗陣，Joe攞咗兩支酒上嚟。「嗱，唔好話我唔開好酒，呢兩支正嘢嚟㗎，又啱女仔飲。」我對白酒冇乜認識，不過兩支酒個Label好舊下，「1998 Chateau d’Yquem，另外一支係德國酒，1983 Egon Muller Riesling。你頭先買嗰兩支留返嚟煮飯啦！」「有冇咁差呀！」「飲過你咪知囉！」  

事實證明一分錢一分貨，冇比較冇傷害，開哂四支酒，飲咗兩啖，已經冇人對我買嗰兩支酒有興趣，跟著啲女圍住Joe聽佢講酒經！「我地一齊買嗰兩支都唔係咁差姐！」小諾攞住杯酒同我講，「唔係差，係好差！真係用嚟煮餸差唔多！」「哈哈！咁Joe嗰兩支又真係正嘅！」