一個香港留學生在美國的生活: 入市

放咗咁耐假，要處理嘅工作實在好多，呢一個朝頭早開會就已經開咗三個鐘，「呢個盤我留意咗好耐，我覺得兩百萬絕對係超值。」Joe講嘅係響Palo Alto近Stanford附近一個已經完工八成嘅爛尾樓盤，五十八個出租Apartment，發展商啱啱破產畀銀行收樓，Joe同呢間銀行關係好，所以早就知道銀行打算放售，「兩百萬買咗返嚟，仲要投資多成百萬去起，依家個市咁差，會唔會風險大咗啲？唔好唔記得我哋仲有兩個Project 做緊，就算有Cash，都冇咁嘅時間Handle啦！」「No risk no gain！何況我覺得風險可控，個市已見底，呢楝嘢響正Stanford隔離，肯定唔會租唔出，成個Project本來就值超過五百萬，依家六折收返嚟，有賺啦！」「咁邊個去run呢個project？我已經有兩個響手，仲有Palo Alto間屋。」「請人啦，下禮拜有兩個interview，我攪掂話你知。」 

 

之後我同Joe去咗地盤睇過，又用咗幾日研個Proposal，终決定接手呢個爛尾Project。整個樓盤收購價係一百九十二萬左右，加上其他license permits 律師等雜費，差唔多兩百萬。由於Joe同銀行關係好，地盤好快就可以重新開工，最後個Project響04年中落成，而事實證明Joe 少眼光獨到，呢個盤唔單止帶嚟可觀收入，仲成為我地升值最多最賺錢嘅投資。 

 

開完會已經差不多中午十二點，「Joe，咁我去食Lunch，洗唔洗幫你買外賣？」「唔洗啦，我自己攪掂，你溝你嘅女啦！」「你又知係同女食？」「估都估到啦！好心你正正經經拍下拖啦！Aaron都結咗婚啦！」「過多兩年先啦！到我有拖拍唔理公司你又會complaint㗎啦！」「做兄弟嘅點會咁衰！我做埋你嗰份，你放心去拍拖！其實你有冇心儀目標？要唔要我介紹？」「你攪掂自己先啦，你一個人帶住Haley始終唔係辦法！」「算啦算啦！我唔同你講，食飯！」每次我一講起呢個話題，Joe都一定顧左右而言他走咗去。 



 

離開公司開車去Ferry Building，我約咗Heather一點響Ferry Building正中央個Information Booth等，去到嘅時候仲未夠一點，於是我自己一個人四圍睇下先。一聽個名Ferry Building就知呢度原本係渡輪碼頭，建於1898，其中有座鐘樓，係三藩市地標之一，又鄰近Downtown，非常繁忙熱鬧，後來因為Bay Bridge落成，渡輪需求下降，慢慢失去惜日嘅光彩同重要性，到咗九零年代初，政府決定重新翻修整個Ferry Building成為主打飲食購物景點，到今年年初先重新開放。 

 

行咗一陣，電話響起「Hello？」「阿偉？我到咗啦，早咗十分鐘。」「我都到咗啦喎，你響邊？我過嚟搵你？」「我響最右邊個Entrance，行緊去Information Booth。」「咁好近喎，我響賣Mushroom間舖前面，你應該＇一入門口就見到！」「我見到你啦！」我擰轉身一望，就見到Heather行緊過嚟。「嘩仲行得咁快嘅？睇嚟我琴晚唔夠努力，如果唔係你應該腳仔軟落唔到床㗎喎！」我笑笑口咁伸手去拖佢，「呢度人多啊，唔好啦，俾人見到點算呀！」我伸一伸條脷，「又係喎！三藩市好易碰倒熟人！咁去食飯先啦，想食乜？」「食蠔好唔好？」「你話事啦！」