一個香港留學生在美國的生活: 老店

雖然買咗咁多嘢，不過我哋唔洗一袋二袋咁麻煩，Personal Shopper包埋送貨服務，於是我哋一齊行返上一樓，Heather就問「有冇諗過去邊度食呀？」「都成六點，不如響附近食啦，你想食乜？」「唔想食中餐。」「呢頭都冇也好嘅中菜又或者亞洲嘢。」跟著我諗咗一陣，「不如帶你去食間平民法國菜？我估你一定未去過。」「好呀！你帶路啦，近唔近㗎？」「行十分鐘就到，響Stockton隧道上面。」  

離開Neiman 沿著Stockton 向上行返去停車場方向，有一條非常陰森老舊嘅隧道，穿過隧道就係唐人街，隧道上面係Bush街，我哋從隧道傍邊嘅樓梯拾級而上，樓梯好斜，仲有一股尿味，相信有唔少homeless響度大小便，而外邊嘅牆全部都係塗鴉，地上佈滿垃圾，Heather個樣好明顯非常唔自然仲有啲驚，「唔洗咁怕，上咗條樓梯就唔會咁污糟啦！三藩市最多就係Homeless，你大小姐少去呢啲ghetto嘅地方，去多幾次你就習慣啦」樓梯都幾長，有三層樓高，行左兩級後Heather扯實我件衫，直到行到出口先放手。  

「呼！終於行完！」「唔洗咁驚喎，你睇吓其人咪又咁行，等陣食完飯我哋直接行去停車場攞車。」「吓？乜有另一條路可以唔行樓梯？乜你唔早講？」「要行遠啲。」「衰人！早知我一定唔行樓！」「哈哈！」上到Bush街人流反而仲多咗，有好多係遊客，因為向右邊過多一個街口就係唐人街入口個牌坊，好多人響度影相，而左手邊係商住區，「嗱，前面見唔見到支法國國旗呀？嗰度係間Bouquet Hotel，座大樓有成百幾年歷史，改建成洒店之後樓下地牢係法國餐廳，平靚正。」  

我同Heather行咗一個Block就到咗酒店正門，大大支法國國旗掛響外邊，推門入去係一條好窄嘅通道，非常古舊中世紀嘅裝飾，酒店接代處就響右邊一個好細嘅房間，只有一個阿婆坐響度，另外一邊就算Lobby，有幾張枱櫈畀住客坐響度休息吹水。再向前行就會見到一部老過我同Heather年紀加埋，仲係用手拉閘嘅𨋢，見到都老爺𨋢，Heather終於有啲興趣「咦，原來仲有啲咁舊嘅𨋢，我響電視見過，仲用唔用得㗎？」「入去啦，我哋要落一層樓。」部老爺𨋢用咗成分鐘先落到樓下，餐廳就響地牢一間大廳入面。  

要咗張兩人枱，侍應攞餐牌畀我哋，菜單選擇唔多，都係傳統法國菜，我哋點咗差不多一樣嘅食物，頭枱佢要洋蔥湯我食蝸牛，主菜都係羊架，甜品係Soufflé，Heather又點咗支$30左右嘅Burgundy，「呢度最出色係個Soufflé，其他嘢一般，平民價錢，算唔錯啦。」「啲嘢真係唔錯，咁難搵嘅餐廳都畀你搵到。」「我都係朋友介紹，係一個做銀行嘅老前輩帶過我嚟食我先知道有間咁嘅法國餐廳。」成餐飯我哋話題都係同Shopping有關，我一直冇問Steward，不過直覺話我知佢哋關係唔係咁好，到埋單嘅，Heather堅持要佢畀，「咁多謝哂，下次到我。」「嗱，咁幾時先？不如你煮，上次參觀你廚房咁正，你肯定煮得好食。」「可以呀！幾時？」「聖誕啦，你會唔會出Trip？」「唔會啦，你唔洗同屋企人過咩？」「Steward出Trip要一月先返。」「咁你想邊日食？」「廿四號。」