一個香港留學生在美國的生活: 聚舊

忙完小詠搬屋，又到要忙我自己新買間Condo，裝修工程全部由Joe阿爸間公司負責，其實我只係畀意見，點樣做點樣整買乜嘢料我完全交畀Joe爸公司決定，整體工程進行非常順利，比予期完工時間早咗差唔多十日。同判頭傾完電話，約好禮拜六去做最後驗收，於是我提早一日，一放學就開車出三藩市，先響Joe間Condo住一晚，第二日一約埋Joe一齊去收樓。  

禮拜五晚一到步，電話就響起，原來係Amy「你係咪出咗三藩市？」「更係Joe少話你知啦！係呀，啱啱到！」「我今晚約咗小玲，要唔要一齊聚下？」「我仲打算一個人去食sushi，我book王將ok？」「你話事啦！」「咁七點，要唔要我接你？」「唔洗啦，我依家同小玲響Union Square，等陣我哋直接去揾你啦！」  

之後我又打畀Joe，循例都要問下佢要唔要一齊食飯，佢當然冇咁嘅時間啦！佢依家住嗰度去三藩市食飯要一個鐘有多，加上禮拜五晚勁塞車，「你有啲誠意好唔好？係請我食飯早啲約，我上嚟要成粒幾鐘㗎！」「Sorry囉！聽日補返請你食好嘢！」「聽日十點響你新屋等我啦！啲裝修你一定滿意！」  

自從Napa Trip之後，我已經好耐冇同小玲聯絡，好多佢嘅消息都像Amy嗰度嚟。放低行李休息咗一陣，又幫Joe收下信，差唔多六點半先出車，今日唔好彩碰到塞車加落雨，短短十幾里路用咗成個鐘先到，咁我更係遲到啦！小玲同Amy已經坐響吧枱等我。我每次訂枱都一係最右手邊嗰兩個位，老闆一定企響呢兩個位前面，今晚小玲坐響最右邊，Amy響中間，我就坐響Amy左手邊。  

我一坐低老闆就笑住講「你兩位朋友早就到了！」「哈哈！知道知道！是我遲到！今天我請客！」Amy就話「本來就係你請客！」冇耐Manager Mike就送上熱茶熱毛巾，「Mike，我應該仲有半支酒響度，今晚飲埋佢啦！」「冇問題，你今晚有口福啦，上個禮拜劏咗條六百磅blue fin，今日啱啱好有得食，你哋慢慢嘆！」好快老闆送上前菜，跟著係一件又一件精緻又好味嘅sushi，其間我哋就講下大家近況，咁當然唔講我同Amy本來打算偷偷一齊去Mexico啦！Amy：「小玲半年前開始學抬拳道，好似仲認識咗個男仔，叫做佢帶埋出嚟又唔帶！」小玲：「普通朋友嚟，唔好講到好似係男女朋友咁啦！」「算啦，你一講到佢就成個花痴咁，嗱，面紅啦！」我望下小玲，又真係面都紅哂喎！我就話：「唔好玩小玲啦，有機會佢實會帶出嚟見吓面嘅！」「唔講小玲咁不如講下你自己，你同小詠點呀？」「做乜無啦啦又燒到我個？有乜點，咪又係咁！」絕大部份身邊嘅朋友都唔知我同小詠其實已經分咗手，Amy就知啲唔知啲，小玲：「上次去完Napa之後都冇再見面，點解你今日唔帶埋佢出嚟呀？」「大家都各有各忙，我要攪間新屋，我一個人咪得囉！」Amy：「咁畢咗業你地搬出嚟？」「其實都應該同你哋講，我同小詠已經分開咗，佢同阿浩上禮拜搬咗出嚟自己住，畢業後小詠會返香港。」小玲就好驚訝「咁突然嘅，幾時嘅事？」「哈哈，其實都有段時間，畢業後我留低佢返香港，咁咪分開囉，好平常姐！」我唔想講太多，反正已經過咗咁耐，最後我交代多兩句Amy同小玲就冇追問落去。 



食完飯埋埋單後，小玲：「你可以車Amy返屋企嗎？頭先佢係坐我車嚟。」「冇問題，Amy屋企同Joe間屋隔幾條街，順路！」Amy：「咁係咪唔順路你就唔車吖？」「講笑咩大小姐，行啦！」Amy上咗我架車，小玲就自己開車走，Amy：「小玲變咗好多！」「係呀，我仲記得第一次見佢個樣，真係好恐怖，直情係一件扒皇！」「你哋啲男人就係咁衰，淨係睇外表！」「哈哈！咁你依家想我車去你度定我度呀？」「唔洗發夢，我男友響LA返咗嚟！」「哦！」我聽到佢咁講，就冇再講落去，玩都有個限度，玩出火就唔好啦！