一個香港留學生在美國的生活: 搬屋

放完假後我同Aaron各有各忙，除咗要準備最後一個學期Final之外，我仲要安排阿爸阿媽過嚟畢業禮，仲有三藩市個Condo裝修差唔多完成，四月尾可以收樓，啱啱好五月尾阿爸阿媽嚟嘅時候響三藩市有地方住。  

Spring Break 前Joey 同Addie都已經冇再學琴。Joey因為功課同Café 工作太忙應付唔嚟，唯有停咗非必修嘅音樂班。就係咁，我見Joey嘅次數非常之少，成個禮拜都未必見到一次，更加有機會扑嘢！ 

至於Addie，就因為已經考完八級，冇必要再上堂，直到學期結束我搬埋去三藩市都冇再見過面。 

亦都可能因為呢個原因，我同小詠扑嘢次數竟然多咗好多！一個禮拜差唔多有三到四晚會一齊瞓，大多數都係響我地原本瞓開嘅主人房，今晚禮拜玉，阿浩同Macy出咗去玩唔返嚟瞓，Camy又啱啱溝咗條仔，已經有成個禮拜冇出現，所以成間屋淨係得我同小詠。  

已經好耐冇同小詠單獨出街食飯，突然心血來潮，帶咗佢去Café食，佢自己有冇去過我唔知，不過我就第一次帶佢嚟，Joey今日唔響度，功課忙，佢已經好少會返嚟返工。同平時一樣，只有一兩枱客，招呼我哋嘅係另一個Freshman學生，呢間Café請嘅全部都係香港學生，所以每兩三年一批唔同嘅人，所謂桃花依舊人面全非，諗到自己好快畢業要搬去三藩市，真係有啲感慨。「諗咩諗到咁入神呀？」小詠望住餐牌問我，「冇嘢吖，諗緊食乜，你想食乜呀？」「你成日嚟，你介紹啦！」「你又知我成日嚟？」「我估吓姐，不過我就未嚟過，你幫我點啦！」我同佢一人叫咗份焗豬扒飯加杯凍檸茶，點完餐之後，小詠就問「你畢業禮Uncle Auntie會唔會過嚟？」「當然會啦！你阿爸阿媽都會過啦！其實我正想同你商量住嘅問題。」「我都係，我打算同細佬一齊搬去附近一間Apartment，雖然我哋各自分房瞓，始終唔係咁好，何況你屋企人都會嚟，太迫啦，又唔方便！」「咁畢業禮完咗你哋再搬返嚟啦！」「睇下點先啦，我可能返香港。」「決定咗？」「未決定，仲諗緊。」「阿浩呢？」「佢又未畢業。」「咁如果你哋要搬返嚟，隨時歡迎！」「咁你呢？畢業後有乜打算？讀Master？」「我打算出三藩市睇下冇乜嘢做，可能同Joe屋企合作學下做地產投資。順便攪掂埋張綠卡。」「咁祝你一切順利啦！」  



第二日我同小詠開車響屋企附近兜咗幾個地方睇下環境，最後決定租個可以用月租形式嘅三房Apartment，呢度大部分Apartment都要求六個月以上長租約，月租比較貴，不過起碼可以解決我哋眼前住屋問題先。到咗四月最後一個禮拜，阿浩同小詠搬屋，我同Aaron 幫手，除咗衫褲之外，就係書同一啲雜物，其實冇乜嘢搬，租咗架Uhaul Truck，一車已經搬哂，屋企傢私絕大部分都係我響新屋入伙嘅時候買嘅，佢哋apartment又細唔啱放，最後臨時臨急唯有去IKEA買住先用。 

小詠同阿浩搬走後，我亦由書房搬返入主人房瞓，住後日子小詠有啲日子都會響我度過夜，直到暑假前佢畢業後飛返香港。