一個香港留學生在美國的生活: Cabo （12）

禮拜四，早上嘅陽光從窗簾間嘅縫隙透入我哋間房，Millie仲瞓到隻豬咁，望下個鐘，八點都未夠，習慣咗早起嘅我冇懶床嘅習慣，於是我起身出去廚房沖咗杯即溶咖啡，食咗兩塊酒店送嘅Chocolate Chip Cookies，跟住就出咗去游個早水。呢個鐘數成個泳池區根本冇人，除咗幾個酒店工作人員做清潔同準備工作外，就只有我一個人。到接近九點嘅時候人流先開始出現，游咗成粒鐘開始有啲餓，於是我上返水，叫咗杯mimosa 加件croissant，攤響沙灘椅上邊休息，過咗一陣，Millie已經換咗泳衣出嚟「咁早唔見人，原來你已經出咗嚟，仲自己一個人食早餐！」「我見你瞓到隻豬咁，咪費事叫醒你囉，放假就應該瞓到自然醒，點啊好使唔使叫多份早餐俾你？」「都好呀，同你一樣就得啦！」落咗單Millie就跳落水，冇耐早餐就送到，「喂！上水啦，早餐到咗啦！」Millie上返水，坐響我隔離，「食完早餐有乜嘢做？我地幾點出海？」「我打算去做Gym，你有冇興趣？」「做Gym，好喎！原你有做開Gym，唔怪得咁好身啦！」「下晝兩點出海，就響沙灘外邊，呢，就係嗰幾隻雙體帆船。」「兩點咪好熱？」「記得搽太陽油呀！」  

食完早餐返番入屋沖涼換衫，跟住就去咗做gym，Millie原來從來都未做過Gym，結果佢只係喺跑步機上面跑咗一個鐘「好攰呀！你做完未啊？不如打電話睇吓Aaron同Doris佢哋起身未啦！」「我仲要做多陣先喎，不如你返去休息陣，順便打電話睇吓佢哋一唔一齊食晏？」「咁不如我約定你喺餐廳等啦，你做完Gym都已經差唔多中午食晏嘅時候。」於是我同Millie約定十二點響Poolside Café見，Millie走咗之後我再做多陣machine 就去咗Sauna。  

去到餐廳已經十二點幾，Millie一早就到咗，估唔到Aaron同Doris竟然起到身，「你地兩個尋晚又去咗邊呀！」我一坐低就質問佢地，「都話去咗朋友度Party，叫埋你又唔去！」「我先冇你咁癲，點呀，陣間同唔同我地一齊出海呀？」「去呀！依家咪返咗嚟同你地一齊食晏跟著出發囉！」「咁就食快啲啦！點九要去到呀！」我地好快咁點哂餐，食物到咗食到一半，「Hey Aaron, Doris！See you again！」Aaron：「Hey, Collin！」原來係Aaron響Resort認識嗰兩住新朋友，互相介紹完之後佢地自己坐響餐廳另一邊，「呢兩晚你同Doris就係去咗佢地度玩？」「係呀！本來仲有兩個女仔，不過今朝走咗，佢地兩個同我地一樣聽日走！」Millie就話「佢兩個都幾高大靚仔喎！」Doris：「你有興趣我幫你約吖！」「痴線咩！我先冇你咁癲！」「出嚟玩有乜所謂喎，最緊要開心吖嘛！」成餐飯談論得最多就係呢兩晚Aaron同Doris做過啲乜，佢哋兩個又一五一十講哂畀我地知，正所謂講嗰個唔尷尬，尷尬就係聽嗰個！Millie聽到Doris講嗰兩個男仔有幾勁，面都紅哂！  

我問Doris：「講到咁正，咁你地今晚仲搵唔搵人呀？」「唔知㗎，好鬼攰，睇吓點啦！可能今晚休息下，聽日一早走！」「哈哈！咁食完就行啦！隻船唔等人㗎！」  

我哋四個匆匆忙忙食完晏趕返房換泳衣，衝到去沙灘嘅時候啱啱好一點四十五。呢隻係雙體帆船，其實只係好簡單由兩隻大號獨木舟用木條固定，中間加個網，上面插支桅桿下面加個摩打，前面坐一個導遊，後面坐一個柁手，我地四個就坐兩邊。導遊循例講一輪要注意嘅安全事項，著埋救生衣，跟著出發！個電話摩打其實冇乜馬力，主要都係靠風力，我地主要係沿海邊淺水區玩，啲水非常清澈，我哋向下望可以睇到海底石頭珊瑚同埋唔同種類嘅魚，我哋彩船嘅兩邊對腳係可以浸入水入邊㗎，耐唔中我哋仲會見到遠處有海豚出沒。Cabo嘅鯨魚季節係冬天嘅12月到春天嘅四月，而我哋而家啱啱係季尾，我哋玩咗兩個鐘一條鯨魚都見唔到，導遊話如果早兩個月，天氣好嘅時候有機會見到三五條鯨魚同事出沒。