一個香港留學生在美國的生活: 回港

一早起身，第一件事就係打去旅行社訂機票。由於係暑假，仲要係臨急臨忙定，大部份嘅航班都已經冇晒機位，最後好彩都訂唔到禮拜日凌晨國泰直航返香港。  

訂完機票之後即刻打俾細佬阿傑，阿傑由溫哥華飛返香港航班就多好多，原來佢訂咗加航即日下晝嘅航班，所以其實佢同我講緊電話嘅時候，佢已經趕緊去機場準備入閘。  

攪完晒機票，就即刻趕返學校Cancel Summer Class，其實呢堂課仲有一個禮拜多啲就上完堂，考埋個試就可以完成呢三個學分，不過真係冇辦法，唔通我仲要等兩個禮拜後先至返去咩！唯有睇吓可唔可以返嚟重讀啦！好彩呢一堂屬於General Education，唔會影響到我下一學期選修core subject！  

當我響出邊處理學校退課同埋攞機票嘅時候，小詠佢好乖咁係屋企幫我收拾行李，自從我同小詠住埋一齊之後，基本上都好少分開，就算聖誕返香港，大家感覺上都覺得響埋一齊。今次我返香港起碼要離開六到八個禮拜，相隔六千幾里，如無意外我要到八月尾先至會返嚟。臨別秋波，我同小詠大家都有啲依依不捨！  

到咗禮拜六嘅下晝，小詠同我一齊出咗去三藩市，我哋夜晚約咗小玲同阿漢一齊食飯，之後小詠就會送我去機場，佢會響小玲屋企先過一晚夜，第二日先至會返入大學城。  



「小玲，呢幾個禮拜就麻煩你多啲搵吓小詠，有時間你就入去陪下佢啦！得佢一個人喺入邊，我有啲擔心㗎 ！」「你放心啦，我禮拜六日有時間，一定會約小詠，佢有時間都可以揸車出嚟響我度住，你放心喎，好食好住，到你返嚟佢起碼肥10磅！」唔知點解，我心入邊總係有啲擔心，有啲唔係咁好嘅感覺，但係又講唔出係乜嘢感覺。  

食完飯之後，大概八點幾，我哋四個一齊，由阿漢揸車去機場。今次去機場嘅心情同以往完全唔同，以往返香港係興奮嘅，期待嘅，今次充滿嘅係焦慮同不安。Check in 完之後同小詠小玲阿漢分別，獨自一人入閘，準備上機。  

自己一個人坐機返香港，通常我都唔會虐待自己，所以今次訂嘅都係商務艙。由於係夜機，一上到機就瞓覺。雖然機程要14個鐘有多，不過我瞓到覺，所以感覺上時間過得好快，轉眼就已經到咗香港國際機場！  

由於到步嘅時間係星期一嘅清晨，我就冇叫阿爸阿媽來接機啦！我自己坐車趕返屋企，返到去見到工人姐姐，仲有阿媽喺客廳度，阿爸返咗工，細佬仲瞓緊覺。   

見到阿媽個樣都真係嚇咗一跳，成個人憔悴咗好多，阿媽見到我，並冇好似啲鬼佬咁又攬又錫，只係摸下我個頭同塊面，叫我入房換衫沖涼，佢話等埋細佬起身就一齊去探婆婆。沖完涼出嚟工人姐姐已經整好早餐放喺度等我食，我已經好耐冇試過咁好有人整埋早餐俾我。一路食早餐阿媽就一路同我講關於婆婆嘅情況，原來婆婆早兩個月身體就已經開始慢慢出問題。婆婆年紀大，有好多老人病同埋慢性病係冇得醫嘅，只不過係最近有少少感冒，最後就演變成慢性肺炎，老人家一有肺炎，手尾就好長！根據醫生講，婆婆佢隨時都可能會離開我哋！一講到呢度，阿媽就開始眼濕濕！一向都係女強人嘅阿媽，我真係好少見到佢喊！