一個香港留學生在美國的生活: 曖昧

自從碰到Addie之後，我好似唔記得自己已經有女朋友咁，全心全意安排同Addie一齊去玩嘅節目。之後嗰兩日，我哋仍然返返去大英博物館參觀，博物館嘅展品實在太多太大，對歷史文化有興趣嘅人，其實三日都唔係好夠玩，如果今次同阿爸阿媽細佬又或者係小詠嚟，肯定玩唔到三日，可能參觀左半日佢哋已經話要走人！  

到第三日晚，參觀完最後一個展館，我同Addie去咗Leicester Square附近一間食Steak嘅餐廳食飯，呢一晚Addie約埋佢中學同學出嚟食，而佢同學呢就同埋佢男朋友一齊，情況其實有啲尷尬， 我估佢同學應該以為我係Addie男朋友，又或者追緊佢嘅男仔。Addie個同學叫做Sammy，靚女一名，起碼我覺得靚過Addie，佢男朋友都係香港留學生，成餐飯佢哋兩個根本就當左我係Addie男朋友，雖然係咁，我心入邊反而有啲興奮。呢餐飯食得好開心，食物水準算唔錯，食牛扒衰極都有個限度，食完飯之後我哋四個就行咗去附近嘅一間意大利雪糕舖食雪糕，我哋一人叫咗一杯雪糕，跟住就行返去地鐵站打算搭車返屋企。Addie叫咗杯Strawberry Cheesecake，我就叫咗Stracciatella，我哋邊行邊食，食咗兩啖Addie就同我講「我呢杯太甜，我可唔可以試下你杯呀？」「當然可以啦，我呢個係牛奶雪糕加朱古力碎，應該冇你嗰個咁甜！」Addie用佢隻匙羹響我杯雪糕度擇咗一啖「你個好味啲又冇咁甜喎！不如我同你交換食啊！」！」「吓？唔係幾好呱，我食咗一半啦喎！」「我都唔怕食你食淨嘅，你怕乜嘢啊！」跟住佢就一手攞咗我杯雪糕，再將佢杯雪糕俾咗我！佢同學Sammy同男朋友睇到就陰陰嘴笑，呢個誤會真係越來越大！  

入到地鐵站之後就各自返屋企，因為佢同我同學一齊走所以我就唔使送佢返屋企啦。返到屋企之後阿爸阿媽同細佬響度睇緊電視，我哋傾咗兩句我就翻房沖涼瞓覺。瞓咗落床腦海入邊都係Addie嘅身影，雖然我盡量提醒自己我已經有小詠，不過呢幾日同Addie一齊玩真係好開心，響張床度諗住佢嘅一顰一笑，仲有個半佢食淨一半嘅雪糕，細佬好自然慢慢咁有反應。我一邊打飛機一邊幻想同Addie扑嘢，今次係自從我同小詠正式拍拖之後第一次諗住第二個女仔打飛機，咁樣算唔算係精神上出軌呢？  

除咗陪阿爸阿媽去探幾個世叔伯之外，餘下嘅時間都係同Addie響倫敦四處玩，冬天嘅英國天氣又濕又凍，我哋響街行嘅時候好多時佢都會翹住我隻手，甚至乎試過有一次佢話太凍跟住將隻手插埋落我衫袋入邊，感覺上就好似普通情侶行街拍拖咁。聖誕之後嗰幾日我哋去咗London Tower，Tower Bridge，Shakespeare’s Globe，又去咗其museum同教堂，響River Thames遊船河，不過我哋一直維持着呢種曖昧關係，除咗耐唔中拖手之外，冇攬過又冇錫過，可能我心入邊始終都仲有條底線，一條道德上不可越過嘅底線。