一個香港留學生在美國的生活: 同遊

大英博物館其中一個十分出名個展區係關於中東古文明，當中包括一個亞述黃銅製嘅古城城門，講真，我唔知班英國佬點樣將人哋成個城門拆咗落嚟再搬去倫敦，不過就當我孭住個背囊帶住耳機欣賞緊呢個有成三千年歷史嘅古城門嘅時候，我見到一個好熟悉嘅背影企響我前邊，第一眼睇我都想唔起佢係邊個，只係覺得個身影好熟，呢個應該係一個扎住條馬尾嘅香港女仔，呢種感覺好奇怪，人在外國住耐咗你好容易睇得出嗰個人係咪香港人，可能從一個人嘅衣着談吐打扮你會發現，香港人大陸人台灣人其實都有分別。 

好奇心驅使之下，我決定行前多兩步，企響佢隔離，點知行到隔離嘅時候我發覺原來呢個女仔就係我教咗一個學期有多嘅鋼琴學生Addie！Addie係暑假嘅時候開始跟我學琴，第一次上堂我哋已經發覺大家都係香港人，我哋上堂都係用廣東話交流，Addie係好典型嘅香港女仔，比較識打扮，雖然唔係果種令人驚艷嘅靚女，但絕對係小家碧玉鄰家小女孩，同佢相處其實好愉快，過去幾個月除咗上堂之外我哋基本上係冇可能見面，作為老師我冇可能主動約佢，更何況小詠啱啱搬咗入嚟同我一齊住，不過如果我話俾你聽我對Addie冇feel就一定係呃你啦！所以當我一見到Addie嗰一刻，其實係十分興奮嘅「Addie？估唔到會響呢度見到你喎！」「咦！咁啱嘅Professor Ma！」「係囉，世界真係細，嚟到倫敦都仲見到你！唔好叫我Professor啦，講咗好多次我只係Teaching Associate，同大學教授爭十萬八千里啊！」「個個學生都係咁叫㗎啦， Professor ！哈哈！」「其實我同你都係學生，我大你一年咋嘛，不如你叫我阿偉啦！」「咁我就唔客氣，直接叫你阿偉啦！」「你自己一個人來旅行？」「係呀！Winter Break冇嘢做，喂飛過嚟英國，我有個中學舊同學響度讀大學，我過嚟探佢順便玩囉！我第一次嚟倫敦咋，你呢？」我諗都冇諗就講咗個大話「我唔係第一次嚟倫敦，不過好多地方我都冇去玩過，反正咁啱碰倒，不如一齊玩啦？」「咁都好呀，不過我打算今日全日都係參觀博物館，會唔會悶啊？」「咁就啱啦，我今日全日都打算喺博物館過，不如一齊行啦？」就係咁，我同Addie開始左我哋兩個一齊倫敦之旅。 

響倫敦一段時間，我同小詠根本無辦法聯絡上，首先大家有唔同嘅行程同時間表，另外就係電腦同電話網絡唔同，佢響日本根本就冇電話，加上時差，所以呢三個禮拜我基本上係回復單身嘅生活。  

呢一日我全部時間都係同Addie流連在博物館入邊，我哋冇乜點傾偈交流，大家都係帶住耳機，慢慢欣賞參觀唔同嘅展館，唯一有傾偈嘅時間就係晏晝一齊食三文治，無獨有偶，我同Addie對歐洲歷史都有共同興趣，佢響香港讀中學嘅時候都係讀文學歷史，同我選修嘅科目一樣，後來發現我只係比佢高一屆會考，大家又係讀同一級數嘅港島區名校，共同話題自然就多。  

到咗夜晚嘅時候，我主動約佢食晚飯「個天已經黑晒啦，你使唔使返屋企啊？如果唔係太夜，不如一齊食飯啦？我阿爸阿媽同細佬今日入咗Oxford，聽日先至返，所以我今晚都係一個人食！」「我冇特別安排啊，不如一齊食啦，你有冇好介紹呀？」「倫敦我又唔熟，我都係遊客，求其搵一間食啦！」我哋兩個行返出去大街，附近已經有好多餐廳，我哋求其搵咗一間食日本拉麵嘅，我哋兩個人就入去要咗張枱，呢間餐廳係日本人開嘅，不過啲食物就不敢恭維，所以啲人話英國最差嘅就係食物真係冇講錯！唯一值得安慰嘅就係有美相伴，食飯嘅時候我終於第一次正式交換聯絡電話，之後我哋嘅話題亦都開始又討論今日睇到嘅歷史文物轉到去我哋嘅私人生活，Addie父母都係要專業人士，住喺香港，佢仲有一個細佢兩年嘅細佬，仲喺香港讀緊書，而佢自己由小學到中學都係讀女校，所以未曾拍過拖。而最令我驚奇嘅係，佢竟然知道我有女朋友，咁樣想扮單身溝佢都冇機會！「我有幾次響學校見過你同你女朋友一齊，你女朋友好靚呀！你一定好錫佢！」「咦！你響學校見到我？點解我見唔到你嘅？」「你眼入邊只係有你女朋友，我呢啲咁嘅平凡女子你有乜可能會見到啊！哈哈！」「點會呀！你講笑咩！」我唯有報已幾聲傻笑！  



食完飯之後，我就陪佢搭車先送佢返屋企，好彩佢住嘅地方同我住嘅地方只係差幾個地鐵站，唔算太遠。我返到屋企之後，開始計劃之後嗰兩個禮拜行程，本來我一個人自由行冇乜特別打算，但跟住呢兩個禮拜要同Addie一齊玩，點都要安排一下，睇嚟有好多以前已經搵個嘅景點，點都要再去多一次！