一個香港留學生在美國的生活: 温哥華

我住嘅呢個鄉下大學城雖然乜都冇，不過都仲有一個機場，由屋企開車去都係廿分鐘左右。今次我冇麻煩朋友接送，我自己一個人開車去停響Long Term Parking，一個禮拜收費差唔多兩百，點都平過坐的士。機程大約三個小時，到步温哥華已經係傍晚五點幾。我細佬阿傑讀緊中學最後一年，佢讀嘅係寄宿學校，冇地方畀我住，而我就住響爸爸一個中學舊同學屋企。  

本來個Uncle話嚟接我機，不過我返正要租車，所以我同佢講我會自己揸車去佢屋企。今次係我第三次去温哥華，頭兩次同屋企人一齊都住響呢個Uncle度，第一次嚟嘅時候好細個，大約八歲，第二次嚟係中三升中四個暑假，過嚟參加一個暑期交換生計劃。  

呢個Uncle我叫佢做黃Uncle，佢同我阿爸由細玩到大，仲響我阿爸阿媽婚禮中做伴郎，黃Uncle響温哥華做地産投資，已經退咗休，呢幾年都係同黃Auntie兩個人四圍飛旅遊享受人生，佢地有一個女小詩，比我大兩年兩個月，同我同阿傑由細玩到大，依家響UBC讀書。  

由機場開車去黃Uncle屋企要成一個幾鐘，主要係禮拜五黃昏比較塞車，黃Uncle屋企響West Vancouver 近海，我記憶中應該起碼有六七千尺仲有私家游泳池可以望住個大海嘅。温哥華四月天氣仲係凍，又係雨季，沿住BC99向北行真係好塞車，加上天陰落雨，去到屋企已經七點，見到熟悉嘅大閘同大門前嘅噴水池，我知道我終於到咗啦！  

停好車響大門傍嘅空位，黃Uncle已經開門走咗出嚟：「阿偉，幾年冇見，又高大又靚仔咗喎！咦？大隻咗添喎！嚟，放低行李快啲入嚟食飯先，你黃Auntie煮好飯等你啦！你阿爸阿媽幾好嗎？」「黃Uncle你好！阿爸阿媽幾好呀！多謝你呀！又要打攪晒！」「唔好講啲咁嘅嘢！我當你自己仔一樣！我地都唔知幾高興你嚟住！阿傑有時weekend都會嚟住兩日㗎，你瞓返上次你嚟住嗰間房啦！有自己廁所，你黄Auntie𢴇好哂啦！」「真係唔該晒！」「你阿爸想投資買Condo啲資料我都準備好，遲兩日同你去睇樓啦！小詩今晚夜啲返，佢平日住響近大學間屋，好少返嚟㗎！佢一知道你嚟咗先話返！真係女大不中留！」呢個時候黃Auntie大叫「你地兩個唔好咁長氣，阿偉快啲去洗個面洗手過嚟食飯！」  



呢餐飯係我離開香港後最令我感動流淚嘅住家飯，好似返咗屋企同阿爸阿媽食飯咁，呢個味道，氣氛，係家人一樣嘅感覺。  

食完飯上房𢴇行李，順便打電話畀阿傑，阿傑聽日會嚟埋呢度住一晚，禮拜日晚先返宿舍，我哋兩兄弟都有差唔多成年冇見，真係有啲掛住呢個細佬！  

講完電話就去沖涼擦牙洗臉準備瞓覺，當我響廁所出嚟，竟然見到小詩坐咗響我張床度笑笑口咁望住我：「點呀？咁嘅樣？O晒咀！唔認得我咩？」