一個香港留學生在美國的生活: 紅木林

今日我地打算去Muir Woods 行山，呢個係一個國家公園，係加州十分重要嘅紅木林生態保育區。揸車大約二十分鐘就到！由於已經十二點，我地決定先去食晏，呢間酒店係冇自己餐廳，只有一個小廚房供應早餐同小食，所以我地行咗去對面街一間意大利餐廳食，餐廳同酒店都響正Sausalito 正中央，係旅遊旺區，今日又係禮拜六，有好幾架旅遊巴停咗響度，1998年強國人已經隨處可見，好彩旅行團一般唔會去呢種細細間意大利餐廳食，我地入到去仲有空枱。好快食完就急急腳返酒店攞車，我實在頂唔順響一個咁靚又寧靜嘅小鎮充斥着普通話！  

去Muir Woods National Park係一條好窄單線雙向嘅山路，上山嘅車唔多，有冇車其實都開得唔快，路窄又多急灣，個Park距離Sausalito只有八公里，去到泊好車，未正式入林已經感到好震撼！四週都係參天大樹，有好多遊人都係一家大細，呢啲就係美國人一般家庭生活吧！我地跟住地圖指南沿住小路入林，越行得深入，樹木就越粗大越高，跟據介紹，紅木可長高達八十米，平均樹齡五百到八百歲，而最老一棵老樹樹齡超過一千二百歲！  

我拖住小詠響林蔭小徑中漫步，久唔久會見到遠處有小鹿出現，沿路有條小溪Redwood Creek，聞説呢區溪流中會有三文魚出沒，可惜我地一條都見唔到！行咗大約一個半鐘就沿途折返，要趕響日落之前出返去，返到車嘅時候啱啱好五點，開車落山嘅時候太陽都開始落山，我地由北向南走，太平洋就響右手邊，小詠望出窗外就可以睇住太陽西沉，「好靚呀！估唔到今日可以睇到日落！」「咁我揸慢啲啦！返正後面又冇車！你慢慢睇！」返到酒店五點半，行咗幾個鐘行到攰晒，食晚飯又太早，於是去大堂坐底叫嘢飲，酒店位於Sausalito正中心岸邊，我地坐響靠窗口位望住海灣，小詠「點解今日冇人表演彈琴嘅？仲想再聽尋日首歌！」「你鐘意首歌咩？等我去問下？」原來今日表演時間係夜晚八點，於是我問酒店經理可唔可以畀我用個琴同埋借琴譜畀我，我同佢講我女朋友想聽尋日首Valentine，經理話當然冇問題，於是我響一大堆琴譜中揾到Jim Brickman首Valentine，原來只係最Basic嘅簡普，小詠好奇怪咁望住我，見我攞住張紙行去過琴度，佢先知我準備彈琴。  

我睇一睇個譜，首歌其實好簡單，主旋律我已經知道，只要配上Chords就可以，對我嚟講真係易過借火！一曲奏畢，大堂所有人都大力鼓掌叫好！


https://www.youtube.com/watch?v=_IXdklZxt2Q




「點解你識彈琴㗎？你唔係拉小提琴咩？」「哈哈！我三年前考完鋼琴就專心學拉小提琴，咁咪冇乜人知道囉！阿輝冇話你知咩！」「衰人！都冇人話我知！等我仲以為我啱啱考過八級比你叻！咁你考過八級未呀？」「Errr…我其實已經考完DipABRSM！」「吓！點解你叻我咁多？仲要三年前已經考晒！」小詠打咗我心口幾下，之後要我再彈多兩首畀佢聽，我無奈之下再表演多兩首，彈咗一段Bach嘅French Suite同一首Mozart嘅Sonatina，結果係經理走嚟問我可唔可以客串表演！