一個香港留學生在美國的生活: 教琴(2)

十二月廿二禮拜一，聖誕假期嘅第一日，Aaron一早就揾我去食早餐做Gym，中午食晏好自然響Café食，Joey見到我地，笑住招呼，同平時一樣，絕口不提今日學琴嘅事。食完晏我同Aaron講我要去書店揾書，佢一聽就耍手零頭，其實我就係想佢唔好跟住我，唔知點解我就係唔想畀Aaron知道我約咗Joey，攪到好似做賊咁！  

Aaron走咗之後我開車去咗附近一間Coffee Shop等Joey放工，我一早已經將自己個小提琴放咗響車尾箱，大約兩點半左右Joey打嚟：「老師！我行得啦！你響邊？」「哈哈！唔好叫我老師啦！我玩下就得！我響油站隔離間Coffee Shop，我依家開車過嚟再跟你車返你屋企啦！」  

由Café去Joey屋企要上HWY5再向南行十分鐘車先到，呢區係新開發區，地大人少，所有屋都係新起，又大又平。一間三千尺嘅屋都係廿萬多啲，同香港真係冇得比！Joey屋企係一間兩層高嘅獨立大屋，有前後花園，停好車之後Joey帶我由車房入屋，佢阿爸阿媽都唔係屋企，聽佢講，阿爸有生意響香港同中國大陸，成日要兩邊飛，好少喺美國，而佢阿媽喺呢度係有返工嘅，好似係會計師之類。佢阿爸阿媽就只有佢一粒女，佢去Cafe打工都係為咗打發時間同埋賺下外快。  

入到去間屋好大好開陽，樓下有一個大客廳一個飯廳同半開放式廚房，客廳落地大玻璃可以睇到後花園。本來我以為會響客廳教琴，點知Joey帶我上二樓書房，樓上有四間房，一間主人房，一間書房，一間Joey自己嘅睡房，仲有一間客房，Joey帶我入咗書房後佢自己返房換衫。我等咗十分鐘左右Joey返嚟，佢換咗件圓領長袖冷衫，深藍色牛仔褲，攞咗尋日租嘅琴出嚟，老實講句，孤男寡女獨處一室，氣氛係有啲怪，但係我真係冇諗過其他嘢，真係一心一意教琴：「今日先教你最基本嘅嘢，嗱，先要學點揸隻琴同支弓，琴上面四條絃係..」我一路講一路示範，當然少不了身體接觸，聞到佢少女嘅香氣，我開始有啲扯扯地，不過我冇做其他嘢，只係專心教琴，同咗大約一個鐘教咗啲基本嘢同樂理，我就同佢講：「嗱，你仲要買幾本初學用嘅琴書，仲有個買琴譜腳架，咁就差唔多啦！尋日唔記得叫你買！有時間最好每日練習10-15分鐘，咁到你開學上堂就會易上手好多！」「咁你聽日有冇時間可以同我一齊去買？」「聽日都可以，咁等你放工後一齊去啦！」  

當晚我打電話返香港，同阿爸阿媽講我會繼續學小提琴，兩老十分高興，仲一口答應畀我買隻新琴。第二日如常同Aaron去做Gym，去Café食晏，之後再同Joey去琴行，個Sales阿伯Steve一見到我地就四萬咁口，我同佢講；「Hi Steve，我今日嚟要買兩個琴譜腳架，幾本小提琴初入門嘅琴書，我仲想再試試隻Roland Feller。」Steve搵咗另一個Sales帶Joey去買書，我就同Steve去試琴，最後我當然買咗隻琴！ 



跟住一連幾日我都去咗Joey屋企教琴，我同Joey仍然保持正常朋友關係，咁點解冇進一步？我都唔知，不過我知道如果我要扑佢，佢一定受！呢個係我直覺！