一個香港留學生在美國的生活: 教琴(1)

送Joey返Café途中，佢不停咁問可唔可以跟我學拉小提琴：「阿偉你咁勁，不如你教我好過啦！我當請私人老師教琴，我畀返學費你好過去學校學啦！」「我呢啲業餘玩下就得，教人就差好遠啦！」「咁你可以教我基本嘢，最初級嗰啲呀！我連琴都未識點攞！」「唔係幾好嘅！我真係唔識教人！不如咁啦，你上堂學先，有唔識先問我啦！」「仲有成六個禮拜先開學喎，可以跟你學啲基本嘢，咁上堂都易啲吖嘛！」Joey用一個楚楚可憐嘅眼神望住我，我真係唔知點推佢！「咁啦，呢個禮拜我仲得閑，禮拜六我會去三藩市兩個禮拜，之後會好忙，如果要教你就只有呢個禮拜！」「咁都好呀！你咁勁一定好過響city college 上堂！不過仲未開學喎！你忙啲乜呀？」「我女朋友響香港過嚟讀書，我要接佢機，跟住幾個禮拜Settle down 同陪佢去玩囉！」「乜你有女朋友咩？冇聽你提起過？」「哈哈！冇乜特別咪冇講囉！」「你女朋友一定好靚女！」「哈哈！各花入各眼啦！你又未見過你點知佢靚？」「你要求咁高，唔靚點做你女朋友呀？」「你又知道我要求高？」「你同Aaron應該有好多女仔鐘意！」「哈哈！Aaron我唔清楚，我就肯定冇啦！」傾下講下，好快已經返到Café：「咁我聽日揾你教第一堂？去邊度學好呀？」我諗咗陣，「去你屋企方唔方便？」「好呀好呀！我屋企好近Café，我同屋企人住，我同阿媽講聲就OK！」「咁我聽日放咗工響屋企等你啦！」我突然間心血來潮，就同佢講：「不過你唔可以畀人知我教你琴，包括Aaron，如果唔係我唔教㗎！」「得啦！聽日見！」就係咁，我收咗人生中第一個學生。  

返到屋企冇耐Aaron就打嚟：「喂！我返緊嚟，今晚食飯？」「好呀！去邊度食？」「café啦！」「唔好啦！晏晝已經食過，去第二度啦！求其食老麥都Ok！」「咁好啦！去你度先！六點半七點左右到！」食飯嘅時候我同Aaron主要講京子嘅事，我完全冇主動提過我同Joey買琴嘅嘢，點知Aaron話：「你晏晝一個人去Café？有冇見到Joey？」「當然有啦！佢響度做，差唔多去親都見到！」「我估Joey對你有興趣，最近佢問我有關你嘅嘢，條女上得過呀！」「小詠下禮拜到啦！」「屌！一件響三藩市一件響呢度！鬼知咩！食得唔食罪大惡極呀！你唔上我上㗎啦！」講真我對Joey並非冇興趣，只不過小詠就到，我唔想又開另一個火頭，不過如果有機會我又唔會say no！「睇定啲先啦！」夜晚Aaron又去咗我度煲碟，十點幾就返去佢姨媽度，佢話前幾日差唔多晩晚都去咗京子度扑嘢，再唔返屋企瞓就大鑊！