一個香港留學生在美國的生活: 學期結束

嗰晚之後，我同Aaron如常見面食飯做Gym，禮拜六中午我倆約咗京子食咗餐飯，食完飯我同京就再冇見面，反而Aaron趁京子仲未返日本，差唔多隔兩三日都去京子度過夜，不過已經唔關我事啦！雖然呢兩個禮拜同京子冇聯絡，不過同Amy就打過幾次電話，我同Amy應該算係好傾得埋嘅朋友，不過絕對唔係男女朋友Feel，我同佢同Joe 約好等小詠到步後見面。 

Alan阿健同阿君禮拜日夜晚先返到，阿君終於話畀我知佢冇個新女朋友，考試過後會約出嚟見面，不過從Alan 口中知道呢個女仔畀阿君大成八年，係從上海嚟嘅大陸人，聽Alan 講呢個可能係拜金女，叫我有機會提醒一下阿君。 

十二月頭兩個禮拜都係考試同Project Deadline，我完全投入考試中，每日大部分時間都係響圖書館中渡過，十二月十九日係學期最後一日，考完最後一科，我自問應該有3.5GPA以上，對自己有個交代。夜晚就約咗Alan阿健Aaron同阿君一班人食晚飯，阿君個女朋友終於曝光，「這個是小敏，也是我們大學同學，小敏，這位便是我常常提到的阿偉，我的同房。」「阿偉你好！很高興認識你！」我第一眼見到小敏嘅感覺係「假」，呢個係直覺，有啲虛偽，做作，尤其是把聲，扮到好嗲，我有啲打冷震，不過禮貌上我都同佢客氣握手傾偈，小敏其實樣貌普通，臉圓圓，有啲Baby Fat ，不過各花入各眼，阿君可能喜歡呢類型，我作為朋友其實唔應該畀意見，我相信日後響屋企應該會成日見到小敏，有機會先提醒阿君兩句啦！呢個weekend後各人都會返自己屋企，阿君會飛返馬來西亞兩個禮拜，Alan同Kim返三藩市，阿健返LA，相信要到下學期開學先會再見。  

「京子禮拜日晚機，我會車佢去機場，你真係唔再見佢？」晚飯後Aaron同我去咗買波霸奶茶嘅時候問我：「你今晚可以去京子度啊！前幾晚佢又問起你，我估佢唔介意我地三個一齊玩！哈哈！」「唔好啦！我同佢又唔係男女朋友，相見不如不見，你陪下佢啦！」「咁我今晚過去陪佢。聽日去唔去做Gym？去Café食Lunch？」「好呀！十一點半啦！夜晚我六點出車，同阿君去三藩市食完晚飯再去機場。我會去Joe度瞓一晚，禮拜日中午先返。」  

我返到屋企已經九點，阿君已經返到，我仲第一次響屋企見到小敏，小敏正在幫阿君𢴇行李，我同佢地打完招呼就入返自己房，阿君走入嚟：「今天晚上小敏會在這兒睡，可以嗎？」「當然可以啦！」我笑住答！「她是你女朋友，有什麼不可以！不用那麼客氣！我們是Roommate又是好朋友！有什麼事要幫忙告訴我就是了！」「太好了！謝謝你阿偉！」就係咁，阿君同小敏開始半同居生活。