一個香港留學生在美國的生活: 感恩節

每逢十一月第四個禮拜四都係美國嘅感恩節，Joe同早幾日打牌原班朋友一早約咗響David屋企開Party過節，Yoyo同Joyce整小食，至於火雞同燒牛肉等主菜，因為工程浩大，最後決定同餐廳訂。我同Joe禮拜四瞓到好晏，差唔多十二點先起身，食咗個Brunch跟住去攞食物，Joe帶我去咗屋企附近一間大型超級市場，入面嘅熟食部門響大時大節都會供應已經煮好嘅火雞火腿燒牛肉之類，十分之方便。Joe佢哋早幾個禮拜已經訂咗同畀晒錢，我幫手攞隻廿磅重嘅火雞，Joe就攞舊牛肉，返到去David屋企已經三點幾，除咗Amy之外，所有人都到齊，同上次一樣，有人打牌有人唱K，Joyce同Yoyo就響廚房準備小食同配菜。  

「阿偉你打牌定唱K呀？」「你打啦！我去廚房睇吓有乜可以幫手！」呢度嘅屋企大部份都係開放式廚房，行去廚房係可以睇到佢哋打牌同唱K，上次同Yoyo唱過歌比較熟，Joyce返而冇兩句。我終於可以近距離接觸到Joyce，Joyce屬於細細粒嬌小可愛型，臉圓短頭髮，老實講，我唔覺得佢特別吸引，Joe身邊咁多靚女，點解會同Joyce攪上呢？仲要明明知道Sam追緊Joyce！我主動幫手洗同切水果，Joyce就乘機話：「有阿偉幫手咁我去睇打牌啦！」我估係因為Joe響麻將枱，佢先會過去坐！  

我同Yoyo好快已經切好水果同準備好配菜，原來Yoyo廚藝唔錯，一個人整咗五六樣配菜，雖然簡單，不過味道好好！我決定以後有機會一定要學下煮飯。  

睇吓個鐘，已經五點半，Amy啱啱到，我一見到佢心入面就係有啲怪，不過Amy就完全冇件事，仲主動走入廚房打招呼！「嘩！阿偉都識煮餸？」「我做幫工咋！切下水果咁！呢啲全部係Yoyo整㗎！」「咁整好不如開餐啦！好肚餓呀！」David:「北尾啦！打埋個北開飯啦！老婆你整咗成個下晝休息下啦！」Yoyo：「好簡單手板眼見功夫！咁我先換件衫先，Amy阿偉你幫我手攞啲紙杯紙碟出嚟，唔該晒！」於是我就同Amy一齊set枱，唔知點解我總覺得Amy對我有啲唔同，我企響佢隔離，聞到佢身上淡淡嘅香味，我已經分唔到係體香定係香水味，Amy着咗件紅色樽領冷衫，深藍色窄腳牛仔褲，將佢修長嘅身形同對長腿表露無遺，呢一刻我真係有啲心動，不過我理智同自己講，小詠仲有一個月就到，千祈唔好攪咁多嘢，一夜情還好，如果玩認真咁就扑街鳥！  

Amy：「阿偉，你好似有啲心不在焉喎？」「呀！我呢兩日瞓得唔係幾好，所以有啲攰，冇嘢嘅！」「我知你女朋友就嚟到，到咗嘅時候，記得介紹俾我哋識，可以一齊出嚟玩！」Joe佢地啱啱打完四圈：「小詠好似廿八號到，你接完機咪出嚟食飯囉！」「睇下點先啦！我幫佢搬咗入dorm先，再安排啦！嗰幾日我都要住你度啦！實會見到面嘅！」  



呢餐係我嚟咗美國第一次食感恩節大餐，Joe班朋友好似我同Alan阿君佢哋咁，好有一家人嘅feel，可能呢啲就係海外留學生嘅生活吧！食完飯大家繼續打牌唱K，我同Amy係最多嘢講，我同佢哋約好聖誕會再出三藩見。今晚玩到十二點左右散場，禮拜五一早我就開車返屋企。