一個香港留學生在美國的生活: 誘惑(1)

Joe坐咗響我隔離，Nancy就坐響Amy隔離，成餐飯我都神不守舍心不在焉，埋單後Amy話要去銀行，可能要一個鐘，叫我地走先，Nancy 就要返學校，Joe話要車Nancy，咁我冇理由自己一個人走㗎，咁我就話：「我都未行過唐人街，不如你去銀行，攪掂call我，我再車你返屋企啦！」Amy諗一諗「咁麻煩你啦！」  

各自分開後，我一個人四圍逛，仲買咗杯波霸奶茶，邊行邊飲。呢度所有人都係講廣東話，好有親切感。行咗唔夠十五分鐘，Joe打電話嚟：「你都算夠義氣啦！溝Amy都唔話我知，等我仲咁辛苦約Nancy出嚟！」「我冇溝人啊！係咁啱一齊食個飯！你不如話我知你尋晚去咗邊好過啦！」「咁就真係要多謝你啦！如果唔係Amy走咗，我都冇機會送Anita返屋企，送到入屋囉，更係送埋上床啦！」「佢咁串個樣你都溝到？」「都係嗰句，各取所需，圍爐取暖！」「我真係服左你啦！」「點呀？係咪溝Amy呀？Nancy同條仔上個月散咗，依家單身，我叫咗佢今晚食飯，之後上我度睇碟，要唔要預你呀？」我真係唔知點答佢好：「屌！你話事啦！我送完Amy就返屋企。」 

收咗線我繼續漫無目的咁四圍行，冇耐Amy打電話嚟：「我攪掂啦！你係邊？我過嚟搵你啦？」「不如響停車場收銀嗰度等啦？」「好呀！我順便買啲水果零食，十分鐘後見！」我架車停咗響地下停車場，Amy出現時攞住三大袋嘢，我幫佢攞上車之後開車返佢屋企。「你識Nancy 㗎？佢好似好留意你喎！」女人嘅直覺有時真係好恐怖，「我都係嚟咗美國先見過佢一次，響Joe 屋企。」「Joe好受女仔歡迎㗎！我成日見佢同唔同女仔玩。」我笑住咁問：「咁你又唔同佢玩？」「我唔鍾意佢呢類型，not my cup of tea！」我笑一笑冇回應Amy，Amy又問：「你女朋友幾時到？」「應該十二月廿八號，我會出嚟接機。」「有冇相睇？」「響銀包，你自己攞啦！」Amy：「原來你鐘意可愛鄰家女孩型。你女朋友笑得好幸福，你對佢一定好好！」「咁你呢Amy？你真係冇男朋友？」「High School有個男朋友，後來佢去咗Boston讀書就分開咗。」大家沉默咗幾秒，「其實你同我ex嘅氣質好似！連外表都有啲似！」我有啲尷尬咁笑住答：「我當你係讚緊我！」 氣氛有啲冷場，剛剛好去到Amy Apartment樓下：「我幫你拎埋啲食物上樓啦！」  

Amy住嘅條三層樓高嘅Apartment Complex，佢一個人住一個一房一廳單位，我先入去放底三大袋水果零食響廚房，Amy響門口除低對長靴，佢對腳真係好長好靚，我其實有少少戀足，我雙眼冇辦法離開佢對腳，「你係唔係有啲過份？係咁望住我對腳？變態佬！」原來佢已經發現我不停望住佢對腳，我好尷尬咁對住佢笑，「Sorry，你咁靚係男仔都會望多兩眼！」「口花花！你坐唔坐陣先呀？我到杯嘢飲？」呢個時候，我個心十五十六，留定唔留好呢？留低我真係怕出事，我不停咁提醒自己，小穎下個月就到，我同京子嘅關係已經好對唔住小穎，我唔可以再咁除便攪第二個女仔！於是我一咬牙同Amy講：「Sorry下次先啦！你休息吓，我仲要趕返屋企搵呀Joe！今晚約咗朋友食飯！」就係咁我匆匆忙忙離開呢個充滿誘惑嘅地方。