一個香港留學生在美國的生活: 家的感覺

過咗一個愉快嘅週末，中午同Joe去咗飮茶，飲完茶先開車返屋企！九月廿九禮拜一係我十九歲生日，Joe 話之前個weekend入嚟同我慶祝！我當然冇問題啦！「我禮拜日中午先入嚟食晏，下晝去揾個Mall Shopping 再揾套戲睇，夜晚同你食 Steak OK？嚟美國一定要食扒！同香港啲牛冇得比呀！」「好呀！你安排啦！不過點解聽落好似人地拍拖咁嘅？行街睇戲食飯！」「屌！咁你食自己啦！」「Joe 哥Joe 少，我講下笑咋！唔好唔理我呀！」  

開咗一個多小時車，終於返到屋企，阿婆竟然唔響度！其實阿婆係有個女住響附近，耐唔中會接阿婆出去買下嘢食下飯咁。佢個女同女婿都係醫生，十分友善，同阿婆差好遠！我入到房見到枱面有幾封信同兩封郵局通知，啲信都係同銀行學校有關，郵局通知係有包果到咗！我阿爸阿媽響我同細佬走咗後大裝修屋企，順便將我啲衫褲鞋襪書本雜物打包寄晒過嚟，總共有十五大箱，仲有我隻小提琴。好彩我間房夠大，應放十隻箱仲有好多位。另外一張郵局通知上面寫寄件人係小詠個名，小詠冇提過會寄嘢比我喎，唔通係驚喜？ 

夜晚晚飯我去咗Alan度食，原來今日係阿健十九歲生日，Kim就話大家報下自己生日，咁大可一齊慶祝！Alan係一月二十歲，Kim六月廿二歲，已我係下禮拜！原來我係咁多個入面最細！Alan就話「咁今日先同阿健慶祝！下禮拜一係阿偉正日，不如大家一出去食好唔好？」「咁不如我請客啦！我成日打攪你地，叫埋阿君一共五個人！」Alan:「邊有人生日仲要請食飯㗎！更係羅漢請觀音，我地請啦！你揀食乜我訂地方，就咁話啦！」「咁多謝大家！不如食韓國菜好唔好？附近有冇好嘅韓國餐廳？」阿健就話：「有就有，不過響大學南面，廿分鐘車左右，如果大家冇意見，咁我訂位！」就係咁，我地大家約定響我生日正日一齊食韓國燒烤。 

食完飯阿君先到，跟著一齊切蛋糕，唱生日歌。一個人嚟到美國，第一年冇同阿爸阿媽細佬一齊過生日，不過呢仲朋友間嘅聚會又好有家嘅感覺，如果小詠可以過嚟一齊慶祝就好啦！。睇一睇鐘，已經八點半，阿君話留底同阿健打機，我比較喜歡打Strategy Game，對於Action Game冇咁大興趣「咁我走先啦，聽日響學校見！」 

離開Alan屋企，一個人行去攞車，感覺有啲失落，四周環境好靜，我想起京子…