一個香港留學生在美國的生活: 出城

呢個週末約咗Joe去佢屋企住，禮拜五落咗堂之後第一次一個人開車出三藩市。加州九月天氣十分好，陽光燦爛，萬里無雲，我揸咗一個小時多少少就到咗Joe 住嘅大廈停車場，Joe親自落樓打開車房門我先入去去「拿，呢度係車房搖控同停車證，反正我有兩個車位，留一個畀你，呢條係屋匙，唔好失驚無神話上嚟就上嚟呀！打個電話先呀！」「Of Course！你估我儍㗎咩！多謝晒呀Joe少！」「難得你出嚟揾下我，今晚就食日本菜，Japantown 最近開咗間十分正宗日本壽司，冇門牌冇廣告，細細間不過勁好食，絕對唔係你啲鄉下地方食到嘅！」我心諗，咁橋嘅？唔通個死仔包知道我上個禮拜食完日本餐仲扑咗條日本妹？「嘩！正啊！嗱！今晚唔準同我爭！我請客！」Joe 大笑「如你所願！」 

 沖完涼換咗衫，差唔多七點，訂咗今晚八點枱，Joe 就話差唔多要出發，因為禮拜五晚會塞車，今晚係Joe 開車，去到Japantown啱啱好八點，餐廳門口就已經有車位可以泊。我一望四週漆黑 一片，根本就係住宅區，不過響街角有間小店窗口透出亮光，果然Joe 走入呢間小店，原來真係壽司吧，入面有一個十分整潔五人吧枱，再加上兩張四人細枱，全部可以坐十三人。師傅係一個唔多會講英文嘅中年日本人，waitress 係日本女仔，我估可能都係學生兼職，英文都係講到一舊舊！Joe 同我都係愛飲食之人，「Sushi only， Omakase啦！包你有驚喜！」我當然聽Joe 少啦！坐響師傅前面，睇住佢好專注一刀一刀咁切，認真，投入，每一件壽司都係藝術品，魚類品種十分多樣，基本上絕大部分都係直接從日本入口，單單Toro已經有三種，仲有一啲好少有嘅時令魚，根本同京子打工間只有Tuna Salmon 同 Yellow Tail 呢啲畀鬼佬食嘅餐廳冇得比！我地每人食咗大約二十件，埋單差唔多四百大元，但係絕對有響日本食嘅 feel！  

食飽飯，Joe 就話帶我去睇夜景，聽日再嚟過三藩市一日遊。於是我地兩條麻甩佬拍住拖去咗 Twin Peak，呢度就好似香港山頂，可以一覧全市景色。我地上到去已經差唔多十一點，我同Joe 泊好車行出外邊，天氣開始冷，「好彩今晚冇霧，平時大霧你就乜都睇唔到！」我深呼吸一下冰冷嘅空氣「三藩市真係好靚，Joe 老土都講句，多謝你，冇你帶路我一個人都唔知點算好！」「嗱嗱嗱！死仔包，係唔係講啲咁嘅衰嘢呀！一世人兩兄弟！我中二個年帶咸書返學，你幫我食咗隻死貓我都未同你計，你依家同我講呢啲？」「過去仲提做乜！係呢，你冇女朋友？你仲有冇揾Nancy？」「更係冇啦！認真你就輸啦！我係一隻冇腳嘅雀仔，我唔會為一棵樹放棄整片森林！」「你真瀟洒！」「咁你又點呀？小詠幾時過嚟？」「過咗聖誕節，City College 收咗佢，佢會讀一個學期先再轉校同我一齊！」「咁咪好囉！喂，有冇相睇呀？」我響銀包攞咗張相出嚟「嘩！靚女喎！扑咗佢未呀？」「痴線！我連手都未拖過！」阿Joe 大笑「你真係冇撚用！不如趁小詠未到，玩盡佢啦！」我當然冇同Joe 講我同京子嘅事啦！「睇下點！不如返屋企，我好攰啦！」「好！聽日再玩過！」  

返到Joe 屋企已經十二點幾，Joe 去沖涼，我打畀小詠，傾到大約一點先收線。禮拜六一早Joe 就叫我起身，話帶我去食本地老番早餐，中午去咗漁人碼頭食蟹，之後又去咗City Hall，Symphony Hall ，Golden Gate Bridge，三藩市真係好靚好吸引，我不知不覺中已經愛上呢個地方，估唔到往後嘅日子，我真係留低咗，工作結婚，落地生根。