一個香港留學生在美國的生活: 壽喜燒

時間過得好快，轉眼已經到咗禮拜四，朝早上完堂Calculus之後我就同阿君講我今晚約咗另一個朋友食飯，「是不是女生？帶出來見面吧！」我笑住講「普通朋友咋！唔好亂諗，我女朋友響香港，聖誕後先過嚟，到時一定介紹你見！」其實過去一個禮拜，基本上晚晚都係同阿君又或者去Alan度食，各自夾返飯錢，大家有個照應。 

響Canteen食完晏，之後就係ESL，我每次都係同京子坐，我地之間亦了解多咗，原來佢只係上年嚟到美國先正式開始學英文，唔怪知得咁辛苦啦！我睇過佢寫嘅文章，真係小學六年班程度左右！基本上係冇可能Pass！「阿偉，你英文咁好，可唔可以教下我？」「其實我英文都唔係好好，不過我比較清楚答題技巧，我可以同你分享下嘅！」「咁太多謝你啦！」京子笑起上嚟，有個小酒渦，眼睛有如一彎新月，勾魂奪魄，絕對係禍水一名！  

放學後，我開車同京子一齊去買餸，佢話今晚食壽喜燒！我地去咗一間響midtown 嘅日式超級市場，店舖雖然唔大，但係乜嘢都有，我自己都入咗一大堆零食。京子比我大兩歲多，已經夠廿一歲，佢問我飲唔飲清酒，我當然話好啦！到畀錢嘅時候，佢堅持晚飯食材同清酒佢畀，話咗佢請我食，所以最後各自畀錢！ 

開車返到京子屋企差唔多已經六點，佢話一個鐘後有得食，叫我坐陣先。我除鞋放喺門口，入到去，係一個四百尺左右嘅Studio，有一個開放式廚房，一個廁所，一個細小嘅騎樓，可以望到大街。家私擺設十分日式，除咗飯枱同書枱電視，再冇其他家具，地上有張大床墊，好似榻榻米，墊上被鋪枕頭十分整齊，仲有幾隻毛公仔。我去到書枱，見到一部電腦同一張京子同父母影嘅全家福，京子媽媽原來係大美人，唔怪之得京子咁可愛啦！「阿偉，你開電視啦，就有得食啦！」「有冇嘢可以幫手呀？」「你去雪櫃拎嘢飮，支清酒雪一陣食飯先開啦！」  

我坐響飯枱，聞到壽喜燒大蔥同昆布嘅味道，同埋房中少女獨有嘅清香，「京子，你有男朋友嗎？」我忍唔住咁問「冇呀！咁你呢？有冇女朋友？」「我女朋友響香港，不過佢打算聖誕後過嚟讀書。」「聖誕後我可能返日本啦！」「咁突然嘅？我以為你咁努力學英文係想留低美國？」「父母年紀大，我係獨生女，父母希望我可以回國。」「咁我都明白嘅！「咁阿偉你有冇兄弟姊妹？」「我有一個細佬，佢依家響溫哥華讀中學。」「有兄弟姊妹真好！我好羨慕呀！壽喜燒煮好啦！你幫手攞支酒出嚟，你唔夠廿一歲，真係飲得？唔好醉咗響度喎！」「等陣你咪知我飲唔飲得囉！」  



京子手藝十分好，小鐵鍋中嘅湯汁翻滾，京子用長筷子把雪花牛一片片煮熟再放入我碗中，大蔥同其他配料刀工整齊，絕對比外邊食嘅好！太幸福啦！一支750ml嘅清酒很快已經飲完，自小阿爸已經把我訓練有數，小小清酒當然難唔到我！反而京子開始面紅，不過應該冇醉。大約八點多，我哋收拾碗筷，京子堅持由佢洗碗，我只好過去站在傍幫手抹下啲碗啦！