一個香港留學生在美國的生活: 搭訕

我坐嘅係JAL Business Class，要響東京轉機，我帶住手提行李走上 upper deck，只有十六個位，左右兩邊兩個位一排，我坐在窗口位，路邊位是空的，飛機一起飛冇幾耐就食晚餐，其實我冇乜胃口，一個人離鄉別井，你話唔驚就假，食完飯，一路聽住 Back Street Boy，冇耐就瞓着咗。  

香港飛東京大約四個多小時，瞓咗一陣就到咗成田空港，我終於可以落機打個白鴿轉，到我再返上機嘅時候，我先發覺身邊多咗個女仔。原本呢個女仔應該坐Economy，不過飛機 over booked，結果 upgrade 咗上嚟。Business Class 其實位置好大，有 privacy，我唔介意身邊坐多個人，其實仲好，有個伴，可以吹水。  

終點係三藩市國際機場餘下嘅十一個小時，我冇再瞓覺，呢個年代坐機係好悶嘅，只有幾套電影，我最後主動同身邊女仔搭訕：「你是美國人嗎？」女仔用極重日本口音嘅英文回答「我是日本人，交換生。」「你第一次去美國？」「唔係，今年第二年，我家住東京，我暑假返東京探父母同家人。」「我是香港人，第一年去美國讀書，請多多指教！」  

就係咁，開始我同呢位日本妺妹仔有一句冇一句嘅交流。  

佢叫做京子，主修英語，京子今年二十歲，很典型嘅日本妹樣子，清爽短髮，眼大面圓，身高應該 160 左右，身材一般，不過笑容甜美，算係靚女一名。京子大我兩年，家中獨女，父母都係打工仔，佢去美國讀書係半工讀，平時有份 Part time 響一間日本餐廳做 waitress，響美國做 waitress 收入唔錯，後來發原來佢讀嘅係同我同一間大學，可惜呢個時候仲未有 email，我攞咗佢電話後，就各自休息。  



當我睇完第二部戲之後，空中服務員送上落機前嘅早餐，大家開始收拾身邊嘅物品，京子：「你一個人到美國，有人接機嗎？」「我有個舊同學住喺Bay Area 好多年，佢會接我啦，放心！」「咁我哋有緣響學校見啦！」「咁你有冇人接機呀？」「有呀，我打工餐廳同事會嚟接我。」「日本人？男仔？」「唔係，係日本女仔，不過佢已經畢咗業，一直搵唔到工，所以仲響餐廳做 part time。」唔知點解，我聽到唔係男仔，我個心感覺鬆晒，奇怪，識咗唔夠一日，佢有冇男仔接機關我叉事咩！不過事實證明，我和京子係有下文嘅！  

由於我同京子唔係美國公民，所以要排另一條長隊，足足等左一個多小時先過到海關。之後去攞行李，雖然我第一次到美國，我嘅行李唔多，一個背包一個手提加一個中喼，反而京子有兩個大行李。作為男仕，我當然幫手攞行李啦，日本妹就係日本妹，除咗佢背包卦住一隻隻公仔，連行李喼都係 Hello Kitty，我一個大男人推住架行李車，吸引唔少怪異目光！  

出到大堂，京子已經見到佢朋友架車響外邊，我同京子互相道別，我攞返我嘅行李，之後佢推住架行李車離去，呢嗰時候，突然有人用廣東話大叫「死仔包，坐飛機都溝到女，你得架啦！」